「喂，你喺度做乜呀！」嘩，好彩平日冇做虧心事啫，突然間，在墳場附近標出一個魁梧身影，喝住我，俾佢嚇死。「阿叔，我喺度斬竹啫，我做有機耕種，想斬啲竹嚟搭棚種瓜呀！」「但呢度啲竹係屬於我，你有冇問過我先？」這裏是公家地方，這些竹怎會是他的，「我住喺呢度，附近嘅一草一木當然就係屬於我㗎啦！」咁都得！不過，我唔想同佢爭拗，惟有施軟功。「啲竹對你都冇乜用㗎啦，不如送畀我吖，最多三四個月後等到苦瓜種出嚟，就送啲畀你食嘞！」「我唔鍾意食苦瓜。」「咁節瓜同勝瓜囉。其實，喺市區買竹都係一蚊支，只係要托成二三十支入嚟坪洲，運費重貴過啲竹，呢度又冇得賣，又難搵，太粗太幼又唔得，我重要分幾次搬，拎返去重要削走啲橫枝，又要……」「得嘞得嘞，最怕人咁多嘢講，你斬都得，之後畀番10個節瓜10個勝瓜畀我。」咁貪心㗎！「好吖，不過，你𠵱家幫我手，托啲竹返去先吖！」於是，阿叔真的乖乖地落手落腳幫我斬，又幫我搬，哈哈，我都冇蝕底！（五十三）
阿花