恒指跌41點，波幅63點。炒友唔多關心指數，集中望住啲新簇簇嘅建行C輪。建行（939）低收2.475元，跌7.5仙。建行早高晚低，早段撲落去買C輪嘅，收市自然一隻二隻扮蟹。
建行C輪22件，P輪兩件。P輪成交唔多，唔講佢哋，講吓C輪。22件C輪，8隻熱門，摸頂上車嘅，到收市平均唔見21%，好傷。建行以2.35元招股，𠵱家只高出5%，預期PE只係12倍多啲，較交行（3328）18倍低好多，遲早上番去。如果認為好快上番去，揀高溢價高槓桿率C輪。如果認為慢慢上番去，則向低溢價低槓桿率C輪埋手。
建行C輪9983：早段39仙，埋單29.5仙，由高位碌低24%。明年6月尾夠鐘，溢價8.1%，槓桿率8.4倍（有效5.4倍），引伸波幅30.4%。對穩陣派嚟講，9983最值得買。
建行C輪2109：早段18仙，收16.5仙，只由高位回落8%。明年12月初夠鐘，溢價31.1%，槓桿率15倍（有效5.3倍）。咁嘅有效槓桿率，溢價值31.1%？識飛咩？睇引伸波幅，33.3%又唔係特別低。行使價3.08元，就算正股升1成到2.72元，隻輪重係價外，輪價不變，溢價都重係19%。建行各C輪中，2109高危。
章盛