高音歌王巴伐洛堤來港演唱，聲言係最後一次，於是票價雖然好貴，會展第三號大堂仍然滿座，兩眼所見，冇百分百都有百分之九十九上座率，藍區（最前）對住大台嘅位置，冠蓋雲集，新舊特首伉儷，邵爵士都在座，其他名人多到數唔晒。
左丁山唔識意大利文，聽歌劇只識其音韻，巴伐洛堤久享盛名，唔去聽咪好冇面，咁多人去，點都要湊熱鬧嘅，於是附庸風雅一番，一入到場，在紅區近雞翼邊坐下，已俾人打頭殼，原來幾位老友已經坐在後面，跟住又見到歌劇戲曲專家才女Ｆ坐在雞翼位，諗住有得寫咯。
才女Ｆ曾任報紙總編輯，報紙執笠，佢亦失業，索性轉行返朝九晚七嘅OL工，對佢嚟講，簡直得閒得滯，索性返中大兼讀碩士，研究文學戲曲，曾出版一本書論述崑曲粵曲與西洋歌劇，想見佢唔使預約，城中每有大型古典音樂會、歌劇、地方戲曲等演出，去文化中心、會展、大會堂就幾乎一定撞到佢。
巴伐洛堤已經七十歲，唔似唱歌，而是「讀歌」，以佢嘅功力，睇住本歌譜嚟唱，十分流暢自然，但係唔夠投入，亦唔夠情感，就好似國學大師教書，在台上捧住本唐詩照讀咁樣，反而伴唱嗰位女高音就似演唱嘞，面部表情十足，感情豐富。左丁山就認為巴伐洛堤係交行貨（雖然佢嘅行貨水平仍然高過其他歌手幾皮），故此全場氣氛唔算熱烈。到「安哥」之時，左丁山已經趕住走人，唔知佢唱成點。
才女Ｆ話：「人畢竟是要退休的。九四年世界盃，我飛去LA聽三大歌王演唱，巴伐洛堤係另外一個人！今晚嘅女高音唱嘅技術把握得好好，但未夠圓渾，略嫌生硬！」聽完之後嘅另一感想就係西九龍文娛藝術區急須上馬，否則樂仕呢類熱心人，成日為演唱場地頭痛，遲早會搞到冇心機。樂仕專搞大型音樂會，不似一啲文化人得個講字，阻住地球轉。政府應該多聽樂仕莫華倫呢班人嘅意見，快啲在西九上馬。