最近樓市淡靜，幾間大代理行，喺度聲大大咁話要「殺人減行」，但原來個別中小型行，利用呢段時間攞舖擴張。好似世紀二十一，其中一間加盟商奇豐物業咁，噚日就為佢哋西貢銀線灣廣場分行搞開張誌慶。
為咗增加分行開張曝光機會，佢哋搵同事扮新郎，同埋扮新娘嘅模特兒一齊，謀殺一眾老記大批菲林。
佢哋話，首三名經呢間分行買樓嘅，可以獲贈婚紗攝影優惠，總值二萬八千八。
奇豐物業董事總經理李峻銘話，多得個市靜咗，佢哋先可以較容易租到舖，月底重會喺馬鞍山開多一間。計埋西貢，有十四間分行，人手一百二十五。
李峻銘重話，公司預計明年投資四百萬，再開多五間分行，人手增加三成。
電郵地址：[email protected]