古天樂飼養的雪橇犬阿Lo可謂狗似主人形，在家中一樣是Mr.Cool，少爺狗不喜歡獨處，一定要主人陪。阿Lo發起脾氣，古仔的睡房就遭殃，床褥更曾被牠咬穿窿，破壞力強勁。
古天樂拍攝無綫劇集《寵物情緣》時，雪橇犬阿Lo亦有份參演，古仔十分喜歡牠，拍罷該劇後，就申請收養阿Lo。古仔日前說：「記得第一次帶阿Lo返屋企，媽咪喺廚房，佢見到隻狗竟然嚇咗一跳話：『嘩！隻狗成隻獅子咁大，攞走佢，我好驚佢。』」
古仔續說：「雖然媽咪初時好抗拒，但係我同媽咪講話阿Lo好乖，又接受過訓練，試吓養先，真係唔得先再算。點知唔使一個月，媽咪已經好錫阿Lo，𠵱家媽咪緊張佢重多過我呀！阿Lo先係屋企大少爺。」
「佢重cool過我」
原來古仔一家都很喜歡動物，特別是狗，養阿Lo之前，古仔與家人住在太平道時養過唐狗「妹妹」，古仔說：「我好細個時，見到妹妹跟阿爸返嚟屋企，自此就收養咗佢，呢隻狗養十五年老死時，一家人都好傷心，隔咗一段時間先收養阿Lo。
「阿Lo重cool過我，平時都未聽過佢吠，佢都好有脾氣，如果我哋成家唔喺屋企超過五、六個鐘，屋企冇晒人，佢會發脾氣，有兩次佢就係咁將我房張床褥咬咗一個大窿出嚟，有次重將廚櫃啲櫃桶拉晒落地，搞到一地都係嘢，自此媽咪去街會睇時間返屋企。」
支持建狗公園
古媽媽幾乎每日都會帶阿Lo到京士柏配水庫公園散步，原本政府準備在這公園撥出小部份地方闢作狗公園，讓附近養狗的居民可以有落腳地方，但因為遭到一些公公婆婆反對，狗公園起了一半亦要暫時停工，古仔認為政府處事不公平。
古仔說：「𠵱家都有餐廳畀主人帶狗入去，咁政府為養狗嘅市民建一個狗公園又有乜嘢問題？既然我哋呢區咁多人養狗，想畀啲狗有個走動嘅地方，點解政府唔支持呢？只要帶狗嚟嘅人自律，注重公眾衞生，我唔覺得會影響到其他人。我認為政府應該對養狗嘅居民公平啲，可以嘗試建狗公園一段時間，如果發現真係有好多問題，咁咪取消囉！唔應該試都未試就話唔得。」
採訪：陳月媚 攝影：何國豪
