塗吓甲油，𠵱家只屬小兒科，上美容院做埋指甲彩繪、水晶指甲、釘埋珠片至夠潮。靚女談美甲可以滔滔不絕，講到睇指甲知健康就可能口啞啞，小記今次搵來5位仁兄仁姐，由中/西醫示範一望一昅一摸簡單3招，即知佢地身體健唔健康。快啲抹走晒啲甲油，等啲指甲透吓氣之餘，順便同自己嘅十指睇個全相，睇吓自己健康與否！
記者：盧家蕙
攝影：陳盛臣
Model：Simba、Ken、Kathy、Sarah、邱小姐
即學！Check指甲基本3式
第一式
半月形1/5為合
指甲底部有個小半月形，以佔指甲的五分之一為合。過大有高血壓、中風的徵兆；過小甚至細到隱藏在肉內，容易氣喘，即心臟弱而貧血。
弊傢伙！小記得兩隻指甲有咋喎，黃醫師：「如果你由細到大都係無，咁係正常嘅！不少人都係得拇指先有，呢啲係遺傳。但如果突變，即變大或變細你先至要驚！」
第二式
㩒手指睇血液循環
先睇青春無敵的Kathy，醫師睇兩睇㩒吓佢啲指甲就話：「健康都算OK，不過血液回流速度唔夠快，應該可以更好的。」
黃醫師說：「最理想的指甲色澤是粉紅色或桃紅色的。大家可先輕按甲面，這時甲面會變白色，之後放手，再檢視一下指甲恢復原來色澤的速度，愈快即代表血液循環能力愈好。」
第三式
睇外形
直紋──機能衰退
Sarah面色比較蒼白，醫師：「一看就知她的指甲顏色帶少少淡白色的，表示佢血氣不足，而且重有直紋。」點解會有直紋？「當體力與精神過於勞動、或睡眠不足，導致抵抗力不佳時，或隨着年齡增長，身體機能逐漸衰退時，就愈有機會發生。」
橫紋──患病或受刺激
「當患病或精神上受刺激時，指甲便呈現出多條橫紋。」黃醫師就有以下經歷：「有次發高燒，病情幾嚴重，痊癒後的一個月，指甲摸上去好似有幾條凹坑，重出現了幾道橫紋。所以我哋𠵱家睇到嗰部份的死指甲，其實係反映咗之前的身體狀況。」再看下去，點知醫師重有個驚人發現：「Sarah隻拇指出現小小的凹坑，可能是有風濕熱毒。」對於坑紋，西醫則說可能是缺乏鐵質所致。
指甲細薄──體力欠佳
醫師：「佢啲指甲比較細、軟同薄身。」邱小姐點頭：「係呀，我留唔到長指甲㗎。一留長會因為唔夠厚身，好易勾到崩咗、裂咗。」小記問醫師：「佢啲指甲就異常地細小喎！」黃醫師：「指甲的形狀不外分為長、短、闊、窄四大類，各有其對健康的影響。過短的指甲，半月形亦會非常小，或甚至沒有顯現，心臟較弱、體力不佳、為人會易於神經過敏。」咁太長呢？「狹長的指甲，健康同樣麻麻，呼吸不好、脊椎骨弱、容易情緒低落，更年期時更為明顯。」
白點──撞傷或缺鈣質
Simba指甲明顯有斑點，西醫陳諾偉：「佢指甲有白色斑點，有人認為是缺少鈣質，不過多數是因外傷造成的。指甲有五分之一是藏在肉裏面的，因此周圍皮膚的損傷，就會影響到指甲的生成狀況。」黃醫師補充：「生寄生蟲的人指甲都會有白斑點的，太多斑點可能是尿酸過高，甚至是慢性腎病、肝病。」
健康指甲──光滑有韌性
睇咗幾個，好似人人都有啲毛病咁，終於見到個綠洲！陳醫生：「Ken的指甲光滑有韌性，甲半月顏色稍淡，是健康的表現。」
除咗粉紅色，重有冇其他色？「有，若天生甲色不是粉紅色就另計，中途變色的人要小心：黃色的指甲，再加上皮膚同眼白變黃可能患了黃膽病；棕色的指甲多數是吸煙人士，尼古丁都滲入指甲邊位了；如果係蒼白色，就可能是貧血、胃潰瘍、血中的蛋白質不足造成的營養不良、腎衰竭，甚至是灰甲。」
中西醫一致：睇指甲知健康
德善堂註冊中醫師黃詠萱：「以下所講的都只是作為參考，絕不可一概而論。清代的汪宏這麼說：『爪為筋之餘，膽之外候也』；《內經》就有此記載：『肝主筋而合。』因此，中醫學認為肝是影響筋骨和指甲的（即爪），肝充盛時就指甲都會靚啲。」西醫陳諾偉亦說：「指甲的確可以透視到人嘅身體狀況㗎！」中西醫都力撐睇指甲知健康喎。
點為之正常呢？黃醫師：「指甲的長度是第一節指頭的一半，指甲的比例最理想是3（闊）比4（長）。尾指2比5（窄長）是正常的，我們係睇頭四隻手指。」醫師續說：「肝會影響指甲狀況，所謂『肝膽相照』是真的，肝膽是一表一裏的關係，肝不好，膽也不會好，指甲也就反映人的膽識了，冇膽識亦即神經過敏了。」
指甲有生死之分
據陳諾偉醫生指出，指甲同頭髮一樣，都是充滿角質的死細胞所組成。亦即係話：我哋𠵱家睇到嘅指甲部份係死嘅，活的那部份藏於手指皮膚下。而指甲前端的半月形（白色區塊），就係指甲母質的一部份，隨着指甲母質細胞的增生，指甲不停地往前生長。甲根皮係覆蓋指甲母質的皮膚，可以保護指甲母質免受外界傷害，保持甲根皮完整，就可令指甲更為健康。
杵狀指──心臟欠佳
中醫說的「杵狀指」，即西醫的Clubbing（杵狀膨大），表現為指、趾第一節肥大，指甲突起變彎，常有疼痛，貌似青蛙嘅吸盤腳。出現杵狀指的原因，中西醫上一致都認為是：1、因為心臟不佳；2、肺功能不全，例如肺氣腫、慢性支氣管炎；3、腫瘤。黃醫師：「患者因為啲血泵得唔夠遠，指頭缺氧，因而出現不尋常的膨大。」如果出現此狀況，就要嗱嗱聲去睇醫生！
