呢期隻隻新股掛牌後都好掂，所以個個老友都話要抽IPO，至於隻股係做乜嘢根本唔關心。
除咗IPO外，工業股亦仍然受追捧。經紀黃話，偉易達（303）早前靚靚業績公布後，有投資者趁好消息出貨，股價一直不振，但近期似乎已經跌定，加上踏入聖誕節，預期電子教育產品V.Smile系列會熱賣，現水平可以買入博反彈，要賺份聖誕禮物照計冇問題。
偉易達今年以來股價升幅驚人，最高見過33.30元。上月公布中期業績，盈利勁升4.5倍至4630萬美元，但股價卻由29元水平跌落嚟，原因係包括金手指在內的基金，趁好消息在高位減持獲利。
不過，當偉易達跌至25-26元附近，芬佬不但停手唔沽，反而買返轉頭，而大股東亦入市增持，加上呢排工業股轉旺，偉易達估計會有不俗反彈。
偉易達昨跌1％，收25.55元，成交股數226萬股，金額5811萬元。
慕容小初