本進士上個星期一寫咗篇有關肥仔局長想喺老鼠樂園攞特權嘅文章。我為存忠厚冇點明肥仔係邊個，搞到有人以為係何志平局長，同文八方已替我澄清，至於肥仔局長嘅解釋，都冇謂再同佢辯駁，反正呢啲咁嘅回應口徑本進士年中冇寫一千都有八百次。
講完啲政壇「鄭中基」，都應該講番啲好笑嘢。前天飯局與幾個CGO新貴講開大陸延遲通報、隱瞞問題嘅陋習，朋友講起年前隨政府團考察所遇的一件笑話，我覺得可與大家分享。
話說二○○○年時有一個政府考察團往安徽交流，其中一站係參觀黃山市。政府團內一行人有老有嫩，先被領往黃山參觀。在黃山上，有土木工程署嘅外籍工程師「驚歎」山上嘅道路在工程學上根本不可能。在參觀後的交流會上，有同事向市長請教黃山旅遊嘅傷亡數字，大家應該估唔到答案。
驚歎迎客松的故事
有關嘅黃山市官員嘅答覆係咁樣：「我們黃山市旅遊並沒有錄得傷亡數字，只有失蹤數字。」讀者睇到呢度可能覺得好離譜，未算呀！黃山市嘅市徽係一棵松樹，就係黃山主峯上嘅一棵人稱「迎客松」嘅松樹。
考察團離開黃山市時每人獲贈一個迎客松襟針，回港之後兩、三個月，有人留意到一則中央電視台報道，內容係：「中央電視台在黃山攝製旅遊特輯時無意發現主峯上迎客松是由橡膠製成。」原來某年朱鎔基總理訪問黃山後說要大搞黃山旅遊，有咗呢句說話，有關市政府官員便乘機喺黃山上大撈一筆，怎料過度開發地下水，導致迎客松枯死。有人怕中央問罪，便想出用橡膠樹頂包！肥仔局長，你啲回應口徑同「橋」有人哋咁高我就服咗你嘞！