政改一仗，在市民一二四大遊行之後急轉直下，賭王已經輸到冇晒聲出，煲呔同泛民主派則仍在對峙，大家都唔肯開最後一隻牌，大概北京重未有指示，民主派亦未有共識。
揸3隻K都冇用
單睇牌面，煲呔仔「K俘」──有北京支持、有肥龍做醜人、加埋自己上電視──擺呢三隻K出嚟，加上何鴻燊胡應湘一啤Dee諗住冇得輸，點知，泛民主派重勁，一開就「四條A」，殺到煲呔曳兵棄甲。
邊「四條A」呢？第一隻A當然係AforAnson。煲呔黃袍加身，靠嘅係民望，係有管治經驗，係來自公務員系統等。但呢啲強項，Anson陳全部有齊，甚至有過之而無不及。對廣大市民，睇陳太嘅四萬笑容點都開心過睇煲呔苦口苦面。陳太出山，煲呔唔煩就假。
第二隻A係AforA45。A45班大狀，論政水平高，唔容易拗得贏；佢哋又上咗岸，唔容易收買；而佢哋識法律，唔敢隨便抹黑。佢哋最絕一着，就係宣布明年組黨，並且mark住譚香文。方案過唔過，關鍵係第二十一票，mark實一票，其他嘅票就唔會轉軚。
第三隻A係America。煲呔一開波就飛去美國打招呼，諗住爭取唔到國際支持，都鬧少兩句（起碼美領事唔好講咁多嘢）；但班鬼佬最終都冇面畀，透過李柱銘講明話唔係支持煲呔個方案，等佢冇得靠外援。
第四個A，可能都輪到AforApple啦。呢一樣八方無謂多講，讀者應該明。唔係話同煲呔過唔去，只係整定。Donald係D，就算你猛打Bow最多都係得個B，人哋A食硬你啦！
要睇吓喺邊個場賭
講完笑話，言歸正傳。「四條A」本來係贏「K俘」嘅，但都要睇邊個賭場，如果係燊哥個場，又係北京班護法做荷官，「四條A」都可以輸。
不過輸贏其實唔重要，香港人輸得起，冇得用手投票咪用腳囉，最緊要咪俾人當儍仔。
煲呔除咗怕A字頭，都怕S，咪就係佢位太座Selina，所以幾忙，都陪太太去晚宴。
爆料熱線：29290000、27860099
報料傳真：26239278
報料電郵：[email protected]