胡杏兒十年前偶遇被遺棄的波斯貓，便抱牠回家飼養，並取名為「黃黃」。杏兒悉心照料愛貓，有時更會請黃黃吃貓草，吃完牠會十分冧。不過，黃黃在家被杏兒姊姊養的兩隻唐貓排斥，性格變得孤僻。
胡杏兒飼養長毛波斯貓黃黃已十年，日前她抱黃黃到九龍塘遊玩，貓咪乖巧聽話，全程未有「咪」過一聲，唯獨表情相當高傲，但杏兒逗牠玩時，貓咪就舒服地瞇眼享受。
搭𨋢執棄貓
杏兒說：「我讀緊中學時，有次喺舊屋搭𨋢見到呢隻貓喺度遊𨋢河，冇人理佢，我見佢好慘、好瘦，就帶咗佢返屋企，後尾先知佢係隻長毛貓，幾筍喎。一養就養咗十年，佢好純、好乖，擔屎唔偷食。」但因胞姊收養了兩頭唐貓，所以黃黃在家裏慘被排斥，變成獨孤貓。
幸好黃黃得到杏兒悉心照顧，她笑說：「我幫佢沖涼、剪毛㗎，幾搞笑，我驚寵物店啲人唔知會點對佢，驚整痛佢。我聽過話有啲人會打針整暈啲貓、狗至剪毛，咁不如自己幫佢剪，慳番幾百蚊㖭。」
熱情冧主人
杏兒續說：「其實黃黃好乖，我哋一返屋企，佢就會出嚟迎接，佢都會跑吓，我追佢，佢就跑，叫佢都識聽。如果黃黃乖，我會畀啲貓草佢食，貓草係一啲乾嘅植物，黃黃一食咗就好冧，好似啲人『隊草』咁，但當然唔會成日食啦。」
除了杏兒與胞姊，雙親亦是愛貓之人，杏兒說：「我記得小學三年班時，屋企已經開始養貓，爸爸養嘅貓都係執番嚟，最高峯嘅時候，屋企試過養五隻流浪貓㖭。」
採訪：朱倬誼 攝影：葉君海
