昨日12.4有二十五萬人上街，多得好幾位耆英出手，促成呢次民主大踏步。第一個梗係白鴿黨涂謹申認識嘅七十八歲老友，佢個全版廣告「告訴我，我會有機會看見普選的一天嗎？」一石激浪，震醒咗好夢正濃嘅香港人，因為大家都以為踢走老董，可以有覺好瞓。
呢位78歲老人始終唔肯露面，但係阿涂話，位老人家噚日有到維園參加遊行，不過行咗兩公里就體力難支，由家人送返屋企休息，咁大年紀都堅持要行，真係值得尊敬。噚日八方都見到好多耆英級人馬上街，有位九十二歲嘅老人家重站上台同阿涂一齊嗌咪，另一位七十五歲姓黎嘅老伯伯亦行到天黑。
第二位功臣係「七十古來稀」嘅胡應湘爵士，佢叫啲遊行人士做「暴民」，大家梗係唔肯過佢，於是和平地遊行畀佢睇；胡應湘呢一篇暴民論，煲呔多得佢唔少。
當然最幫煲呔手嘅重係剛過八十四歲生日嘅澳門賭王何鴻燊，冇法，佢生日煲呔親自去田府賀壽，重一齊食蟹，賭王當然投桃報蟹。但噚日，遊行隊伍中就有由海外歸來者話正因為佢大大聲開個五萬人嘅盤口，所以一定要行。𠵱家咁多人上街，「叫賭王搵窿捐喇！」
輪到大陸耆英發功
至於特首煲呔，雖然剛六十出頭未算真正耆英，但都湊高興學人發表電視聲明，以為動之以情，但係香港人咁聰明，而且嚇大，否決方案普選無期？咁煲呔可唔可以寫包單，通過方案就有普選先？佢話相信自己會睇到普選喎，即時噓聲四起，𠵱家科學昌明，好似邵逸夫爵士今年九十九重鬼咁精靈，曾爵士如果同邵爵士咁長命，咁我哋咪有排等？
最後一位耆英係「香港良心」陳四萬，破天荒走埋出嚟撐普選。陳太比煲呔大四歲，以前佢兩個好好感情，十足兩姊弟，𠵱家就各為其主，嗱，煲呔個「家姊」都站在市民一邊，喺十字路口應該向邊度轉，好清楚啦。
香港耆英一族喺今次爭取普選中出咗咁多力，下一步就輪到大陸耆英啦，胡主席、溫總理加埋曾副主席，你哋聽到香港人嘅真正聲音未？我們要普選時間表，唔要遊花園。
爆料熱線：29290000、27860099
報料傳真：26239278
報料電郵：[email protected]