餐廳R飲茶時大叫：「六十萬銀租一個月，問你點頂？」租乜嘢呀，係租一間蘭桂坊餐廳，餐廳R一早知道有此事，不過見到《南華早報》「利是」專欄（十二月二日）寫咗出嚟，佢就唔怕講。蘭桂坊老牌餐廳VaBene在原址開業十五年，地下店舖可以容納一百個位，餐價「貴貴哋」，唔算太高昂，呢處嘅意大利餐叫做唔錯，係蘭桂坊生招牌之一。呢間地舖原本月租二十四萬，因為轉咗手，新業主據講與何賭王家族有關，新租係六十萬，VaBene唯有舉手投降。蘭桂坊之父盛智文喺呢度有唔少舖位，租咗一間畀VaBene，等佢唔好搬走或者結業。
一百個位，月租六十萬，每日要做幾多生意先至夠交租？盛智文話根據佢本人經驗，冇餐廳可以負擔得起如此高昂租金，但係一雞死一雞鳴，喺IFC經營Harlan's嘅老闆HarlanGoldstein已經承租咗，呢位先生預備開辦一間紐約風格嘅意大利餐廳，一於冇有怕，因為佢手上有好多忠實食客，求佢攞張長枱喎。
餐廳R就唔係幾信。蘭桂坊極少早餐與下午茶生意，一日做兩次午餐，快樂時光，晚餐，餐廳R話：「最緊要有tableturns（翻枱），算你每日每餐轉兩次，共六次，都係得六百個客，日租二萬，即係每位客人要起碼消費幾多呢？以七成毛利計，每位客人嘅最低消費要有四十八蚊，就夠交租，計埋人工、水電煤、折舊等等，每客人消費一百蚊，勉強可以打和，似乎可以做得過，但係，你哋行入VaBene食餐飯，閒閒哋都要三四百蚊找數啦，點解VaBene唔敢以六十萬元承租呢？道理就係，一百個seat位嘅餐廳，一日做六百個客，非常唔容易，越係收得貴，tableturn越低，否則係人都敢開餐廳啦。」餐廳R驚，VaBene唔制，當起嘅Harlan's就越做越勇，要令盛智文跌眼鏡。大家去新名牌餐廳食飯，記住消費嘅一半或以上係用來交租嘅。