因患上重感冒而順延在台灣演出舞台劇《雪狼湖》的張學友，昨晚由台灣返港。不過學友此行並非只是休息，而是為跟家人見面，免他們掛心。
張學友大前晚在台北巨蛋首晚演出舞台劇《雪狼湖》時，因患重感冒而被迫腰斬，前晚他帶病演出第二場時，聲音仍然十分沙啞，為此，學友在演出完畢後隨即舉行記者會，宣布將昨晚、今晚和明晚三場舞台劇延期至本月十一至十三日舉行，以便回港好好休息，調理身體。
怕再腰斬
昨晚六時四十五分左右，學友在演唱會製作人陳淑芬和兩名保安陪同下步出機場，他表示一早知道自己患上感冒，但沒料到影響會如此大。學友說：「平時呢啲小病唔會睇醫生，今次以為冇乜嘢，點知報紙咁大篇幅報道。其實去台灣之前我睇咗醫生，去到當地又睇第二次，噚晚叫做做完，但自己好大壓力，因為怕做做吓又要腰斬，所以後尾我同主辦單位講，將跟住落嚟三場舞台劇順延一星期。八號我先至再返台灣，多謝大家關心。」
勤做運動
學友表示返港後會好好休息及做運動，學友說：「相信休息兩、三日已經足夠，其實我返香港嘅原因之一，亦都係唔想屋企人擔心。」據知學友在舞台劇腰斬後哭得非常利害，學友承認說：「喊係因為難過，其他演員做得咁好，因為自己而腰斬，個心好唔舒服，覺得好對唔住，好唔好意思，自己已經盡咗力。我收到好多fans嘅信，佢哋話好擔心我，未試過睇騷睇到咁驚，怕我做唔到。」
Fans及朋友的關心令學友感動不已，但學友希望大家不用太過擔心，他承諾會好好休養，保護自己身體，明年減少出埠，多些時間陪伴家人。
採訪、攝影：藍文浩
