噚日係香港人再次為民主自由而上街吶喊嘅大日子，希望盡快落實普選時間表。噚日葉璇唔得閒上街，皆因佢要去旺角，宣傳同黎明合作嗰套電影《情義我心知》，着住條桃紅色低胸連身裙嘅葉璇吸引好多市民圍觀。
雖然工作咁忙，葉璇重記得噚日係普選遊行大日子，佢話：「我係有打算去，都有朋友叫我，不過要宣傳，我係支持普選，普選都搞咗咁多年，係需要有自由空間，我去唔到都想呼籲吓，叫其他人支持。」
港姐指遊行消極
有好多藝人唔敢講政治，但葉璇就冇有怕，佢話：「我支持自由呢個想法有乜嘢問題？我唔覺得個話題敏感。」相反，一班港姐、港男同李彩華噚日晨咁早去香港大球場慈善健步行，都話唔會去遊行。
港姐亞軍陸詩韻重話：「我聽過今日有遊行，但係唔會去，我覺得遊行呢種表達方式好消極，我就未試過去參加，亦唔會用呢種方式表達自己。」遊行都話消極，馮仁昭就好奇點先至係積極？
