沙田新城市廣場零售暢旺，帶挈隔籬商場都值租，好似偉華中心咁，二樓九號舖，業主將其中六千呎招租，即刻有幾個大型連鎖集團爭住話要，最後由大快活擊敗對手，成功以二十萬承租，呎租三十三個三。
中原黃金鳳表示，原來大快活喺九六年曾租過呢個舖位，後尾由好運葡國燒烤租用至今年七月；唔怪得大快活出價咁勇啦！原來對個場好熟悉，連中式酒樓集團都唔夠佢爭。成間九號舖共一萬零八百六十一呎，上手租客租晒，月租都係十八萬啫。
黃金鳳透露，業主見市場反應熱烈，決定將其餘樓面都攞埋出嚟招租，叫價都係二十萬，若果租得出，每月收益就比舊租升咗超過一倍。
電郵地址：[email protected]