早兩日氣溫重係25℃，今朝跌至12℃，咁鬼凍，朝早想起身，真係突然變咗不可能的任務！想要屋企暖笠笠，暖爐當然少不了，傳統暖爐成個鐵籠咁款，造型認真麻麻。想襯番12月全屋聖誕裝飾，近年出現了「假火暖爐」，不過講到有姿勢有實際，今次呢個18樓都可以用嘅真火暖爐一出，所有暖爐都要行埋一邊！
記者：鄺天樂
攝影：黃子偉、何家亮
Model：Doby@Salvador
Warm爆真火爐
由細到大，都好羨慕外國嘅小朋友可以圍住個暖爐、好溫馨咁過聖誕節，可惜香港都係高樓大廈，唔係豪宅大家族，就算送個真火暖爐畀你都得物無所用。終於等到來自澳洲的EcoSmartFire真火暖爐，實現唔少人嘅童年夢想。EcoSmartFire真火暖爐可暖範圍達400平方呎，採用天然提煉的乙醇作燃料，每5公升乙醇可供大火燃燒約7小時，有3種火力選擇，細火更可燃燒超過24小時。燃料乃全天然提煉，冇煙冇味，就算係冇煙囪的高樓大廈亦可使用，打破傳統煙囪火暖爐的局限！
暖爐售價：$51,000
乙醇售價：$250（5公升）、$980（20公升）（a）日
畫板變暖板
傳統暖爐又唔靚又阻碇，有無諗過架喺牆上嘅畫其實係一個暖爐？歐洲品牌Gilman推出全新伊卡奴暖板，利用空氣對流，可以保持室溫於攝氏23度，薄薄一塊暖板摸落去暖暖哋，唔怕辣親，掛喺睡房睡床邊啱啱好，可暖範圍亦有100平方呎。其陶瓷板面可供水溶性顏料上色，令你可以喺上面任意發揮，既係暖爐又係你嘅畫作！
售價：$998（b）
充油式ByeBye！新式座地式暖爐
傳統發熱線暖爐容易辣親，唔夠安全；充油式暖爐安全性提高了，但唔係即開即熱。科技總係新的好，新式暖爐外形靚，又解決咗上述問題，老友，準備畀錢啦！
炭影扮真火
Dimplex出品Jazz炭影木身暖爐，可暖範圍達200平方呎，除擁有窗框式設計外，Dimplex獨有Optiflame效果做出像真度極高的火燄效果，齋睇都覺得暖番晒啦。
售價：$1,888（c）
遙控火燄
Dimplex另一炭影暖爐，可暖範圍達200平方呎，備有隱蔽式開關外，更備有遙控及火燄獨立操作技術，就算唔係咁凍都可以「大大把火」，當燈飾都得！
售價：$2,348（c）
遠紅外線健體燈
JSA遠紅外線熱能健康燈，可暖範圍200平方呎，利用遠紅外線發熱，熱力均衡外，更有助人體消除疲勞，促進血液循環。此外，遠紅外線發熱不會抽乾室內水份，適合怕凍又怕乾人士。
售價：$880（c）
保暖兼淨化空氣
JSA全新直立式遠紅外線熱能健康燈，可暖範圍150平方呎，即開即熱外，更備有遙控及兩段發熱選擇。利用遠紅外線發熱更可節省能源，並有負離子淨化空氣功能，健康之餘更加環保。
售價：$880（c）
冷暖兼備
Dimplex直立式陶瓷電熱暖爐，擁有1,500W火力，可暖範圍約150平方呎。除備有冷、暖風以供選擇外，更有負離子淨化功能，令你暖得來更健康。
售價：$808（d）
浴室都可以暖笠笠
沖完涼，浴室內總係凍冰冰，各大生產商當然會照顧到大家需要，添置一部浴室用暖爐，以後沖涼、去大大都唔使騰騰震啦！
米格熱能
想洗白白時都可以暖笠笠？備有防水功能的Dimplex米格熱能暖爐就最適合不過，可暖範圍約180-200平方呎，利用超淨放射式熱能技術，快速令居室空氣變暖，浴室大廳皆可用。
售價：$1,398（c）
浴室恒溫
De'Longhi直立式暖風機備有防水設計，可用於浴室，可暖範圍約60平方呎，足以令整間浴室變得和暖，另設有恒溫操作及過熱保護裝置，方便又安全。
售價：$268（c）
貼身保暖小家電
可手洗電暖氈
無論間房有幾暖，被窩一樣凍冰冰，想瞓覺好啲都幾難！來自英國的MorphyRichards，話咁易弄暖被窩，而且以不超過40度暖水手洗即可，清洗都好方便！
售價：單人28×60吋$638、雙人48×60吋$998（c）
發熱小暖墊
唔少女孩子冬天手腳便會變成小冰條，坐喺梳化睇電視，想腳仔暖暖哋唔變冰條？意大利Ardes的小腳墊絕對係女孩子冬天恩物，將手、腳等放在小腳墊上，乜寒流都唔使怕啦。
售價：$315（c）
售賣點：
（a）designlink
（28388299）中環都爹利街律敦治中心1樓110號舖
（b）太平洋家庭電器陳列室
（24183119）葵涌大連排道58號樂聲工業中心8樓B座
（c）崇光百貨
（28338338）銅鑼灣軒尼詩道555號崇光百貨10樓
（d）豐澤電器
（25555788）旺角彌敦道664號惠豐中心地庫
＊凡於崇光百貨購買iNNOTEC產品滿$1,200，即可免費獲增電子萬用鍋乙個。（特價期至12月尾）