臨近年尾，特別多論壇和研討會舉行，正是回顧過去，展望將來嘅時候。日前，香港總商會就舉行了一年一度嘅香港商業峯會論壇，中電行政總裁包立賢都有出席，因為佢係講者嘉賓之一。
會上包立賢被問了一個敏感問題：「點睇香港嘅空氣污染問題」，佢承認香港空氣污染問題嚴重，但就強調，其實污染源頭只有5%嚟自香港，而其餘95%都係嚟自內地珠三角。
佢重話，中電會增加使用天然氣，減少煤炭發電，並深信香港方面可以減低污染氣體排放。最大嘅挑戰反而係珠三角，因為隨住廣東省經濟不斷發展，每年對電力嘅需求以20%幅度增長。不過佢都有提出一個解決珠三角空氣污染嘅方法。
佢話喺珠三角嘅工廠唔少都係香港人擁有，所以好希望香港嘅廠家能夠將國內廠房嘅環保要求，提高至好似香港嘅水平，咁樣香港嘅空氣質素就會好啲。
李華華