恒指上周收15200齊頭，全周升118點。中移動（941）最猛，收39.80元，全周進帳1.80元，帶動恒指上升113點，即係全周恒指升幅，淨係中移動幾乎已經包晒。
中移動又升破10月初高位，創01年7月以來最高價。中移動有景，其他國內電訊股同相關C輪，睇多兩眼有着數。
聯通C輪9772：聯通（762）全周只升5仙，收6.60元，估計會跟住中移動上啲，大家都係做移動電話生意。
搵聯通C輪埋手，有啲難度，因為交投唔大。6隻C輪，成交金額計埋唔夠3百萬銀。數據最靚嘅係4562，明年2月初夠鐘，輪價55仙，溢價2%，槓桿率12倍（有效9.3倍），引伸波幅23.7%，不過弊在成交得6萬份，餵滿半個散戶嘅柯打都唔夠。要買賣易啲，可以向9772埋手，明年5月尾到期，輪價73仙，溢價6.2%，槓桿率9倍（有效5.8倍），引伸波幅31.1%。
中電信C輪9796：中電信（728）全周冇升跌，可以追落後。揀C輪，一係9796，一係9886。9796交投多啲，可先考慮，明年9月初到期，輪價26.5仙，溢價9.8%，槓桿率10.2倍（有效5.6倍），引伸波幅29%。
章盛