兩隻新股今日齊招股，分別係長實分拆嘅泓富，同廣州大地產商雅居樂。兩隻新股噚日率先對撼。話說雅居樂預先公布噚日四點喺金鐘港島香格里拉「開波」，泓富就前日先公布三點三喺紅磡海逸見記者，重要等到三點半至開始，去得泓富就去唔到雅居樂，加上大遊行，電視台人手緊張，只能去一處，話晒長實招牌大，加上領匯效應，雅居樂雖敗猶榮。
唔知係咪小勝一仗，晉身上市公司主席嘅泓富主席趙國雄噚日都相當風騷，話自己係亞洲管理最多REITs嘅人，做完樓神，再做亞洲REITs王。不過，一向形象百變嘅佢遇到對手，就係泓富資產管理行政總裁林寵陞，林氏喺記者會後出其不意取出cap帽，白底綠字寫住「P-REIT808」，即泓富的英文縮寫同交易所編號，即刻搶咗趙國雄嘅鏡頭。