快到聖誕，波波最開心，因為近年大部份重頭電影都集中在聖誕上畫，反而暑假檔期就相對地比較弱。所以聖誕一到，就表示有好戲睇，加上各大電影公司越來越早的宣傳攻勢，心理上已經鋪排了一種上戲院的氣氛。所以不如提早講吓今個聖誕節想看的電影。
港產片──我相信大部份香港人同我一樣，其實最想睇港產片，因為一個字──「少」。今年港產片製作量繼續下降，一年少過一年，搞到好似唔睇就快冇得睇，或者要去博物館至有得睇。不過我覺得製作量少是代表了投資更加謹慎，製作更加認真。所以去到聖誕檔期上映的港產片我覺得特別吸引。
今年打頭陣有陳可辛的《如果．愛》，我相信單看導演的名字已經是個信心的保證。陳可辛已經有一段很長時間沒有拍攝港產片，《三更之回家》對我來說只算三分一部。所以可以說是陳可辛醞釀多年的作品，值得期待。
跟着有中港大製作《無極》，在電視上看過預告片，以為在看《魔戒》，氣勢迫人。但部份電腦鏡頭，特別是一些闊鏡頭感覺像看卡通片，希望到影院看的時候不會有這個感覺。
最後是聖誕尾的《情義我心知》，幕後黃金三角組合再加上聽聞是黎明突破性的演出，希望也可以突破港片的悶局。
聖誕是一個長假期，一定不止睇一套戲，我波波就打算以上三套港產片都睇，希望各位讀者都支持這班有誠意的電影人，大家都唔想去博物館至有港產片睇。