導演馬偉豪可算是Niki的伯樂，由第一部電影《百分百感覺2》開始，差不多每次馬偉豪開戲都會預Niki參演，他表示當初選Niki入行，是看中她可塑性甚高。
馬偉豪說：「Niki有一份好獨特嘅氣質，係圈內缺少嘅，佢可以演嘅戲種好廣泛，可以好草根咁扮工廠妹，亦可以着靚靚扮淑女，一路睇住佢由電影到電視，發覺佢不斷咁進步，由《愛作戰》、《大頭怪嬰》到《玉女添丁》，對唔同角色演繹都把握得好好。
「至於佢攞嘅飛躍進步女藝員獎，即係佢得人認同囉。」
舒淇玩完轉頭狂喊
同佢喺《百分百感覺2》合作過，佢性感得嚟可愛，係喺骨子裏嘅性感。但講到做戲佢就好放，呢一刻可以嘻嘻哈哈同你講HelloKitty，下一刻就已經可以好入戲咁喊到呼天搶地，完全係天生做演員嘅好材料。而且佢好勤力，每次喺片場都交足功課，背熟劇本，對角色性格掌握得好準，攞金馬影后真係實至名歸。
蔡卓妍扮醜勇氣可嘉
大家差唔多同時期出道，講佢有啲似講緊自己咁，佢係先唱歌後拍戲，可以話係半途出家，可能暫時被外形同年齡所限，都係演一啲嬌俏嘅角色，不過聖誕會有一套戲演醜女，睇過劇照真係幾醜，佩服佢嘅勇氣同埋嘗試精神，有機會都想試吓做李笑好咁嘅醜角。
鄭秀文天后與獎無緣
同佢合作過一套電影《同居蜜友》，佢好照顧後輩，同佢做對手佢會好易帶你入戲。Sammi形象百變，代表佢好鍾意試唔同嘅嘢，近期個套《長恨歌》講佢由後生演到老，可以話係Sammi演技嘅大挑戰，佢都應付到，唯一可惜係攞唔到獎。
楊千嬅唔只識得喪笑
千嬅好聰明，咪睇佢嘻嘻哈哈，佢有自己一套思想同演繹方法。佢演戲好用心亦好隨意，掌握得好好。睇佢套《地下鐵》同《餃子》，就可以知佢對唔同角色都拿揑得恰到好處，唔好以為佢淨係識演笑片。
張曼玉演技爐火純青
唔使講啦，Maggie係殿堂級人物，亦係好多演員奮鬥嘅目標，包括我在內。我好欣賞佢由俾人話花瓶到俾人認同嘅毅力，亦欣賞佢演戲嘅方式係由內到外，無論內心戲同表情都交足功夫，可謂爐火純青。
