孖仔組合Soler和陳啟泰一直被指生得餅印一樣，本報日前安排「三兄弟」團聚，他們初次見面，簡單寒暄後，已馬上熟絡起來，三人談個不亦樂乎，話題圍繞着音樂和女人為主，見到他們雞啄唔斷的講個喋喋不休，看來三個男人都可以湊成一個墟了。「三兄弟」共聚了近三個多小時即成為老友，臨別時更握手一番，兄弟情深。
陳啟泰談Soler：
陳啟泰甫見Soler兩兄弟，即衝口而出：「我終於等到呢一日，不過我哋睇相會似啲，真人好似冇咁似，如果唔係我呢排剃咗鬚同剃頭，可能會更加似。」
陳啟泰回想第一次認識Soler時說：「除咗報章雜誌見過，我有一次無意中聽到區瑞強嘅電台訪問，聽過佢哋唱live，雖然最初認唔到佢哋把聲，但憑直覺就知係佢哋，之後區瑞強揭盅，果然我冇估錯！」
問陳啟泰覺得Soler兩兄弟怎樣？他說：「我其實都有留意佢哋嘅報道，之前係認唔到佢邊個打邊個，不過呢次相處後，我覺得細孖Dino白淨個樣細啲，似十年前嘅我，而大孖Julio就似𠵱家嘅我。」
變臉再會兄弟
陳啟泰續說：「我之前重以為Dino唔出聲，但同佢相處過之後，原來佢嘅性格好活潑，好鍾意開玩笑，真係出乎我意料之外。至於Julio份人就好主動，佢絕對係一個知音人。」
陳啟泰和Soler即場交換了聯絡方法，希望日後繼續保持聯絡，他們更希望在舞台上合作，陳啟泰說：「或者等我下次留番長啲頭髮同鬚根，又曬番黑啲，話唔定下次拍埋一齊，我哋比𠵱家重似樣。」
Soler談陳啟泰：
Soler兩兄弟，擁有意大利血統，二人性格亦較開朗，Soler覺得樣貌與他們酷似的陳啟泰性格怎樣？Soler說：「阿Ken（陳啟泰）活潑又主動，佢一腳踢做晒我哋兩兄弟擁有嘅嘢。」
Julio表示未真正跟陳啟泰碰面前，他都認為彼此很相似，但面對面後，Julio說：「又唔係咁似，可能只係影相某一啲角度啫。大家見到我哋三人並排合照可能覺得似『三胞胎』，其實我就認為大家太刻意喺呢方面，我舉例中國挑選解放軍，每一名入伍嘅軍人，驟眼睇都一個模樣啦。」
百分百中國人
Julio覺得陳啟泰的輪廓有點像外國人，即追問他：「你屋企人係咪都有外國人血統？」可是陳啟泰表示其家族成員全是百分百中國人，不過父親的樣子都很像外國人，Julio聽到後仍半信半疑，懷疑隔多代遺傳，可能陳啟泰不清楚而已。
Julio表示有看過陳啟泰主持亞視節目《百萬富翁》，更不忘為陳啟泰大送高帽，他說：「我以前喺英國睇過呢個節目，我哋覺得你好啱節目個tone，水準好高，如果第二個做我哋就未必睇啦。」
Soler平時演出時甚少穿上西裝，這次穿上西裝look與陳啟泰合照，Julio的感覺是：「回憶番細個偷偷哋拎阿爸嘅西裝同皮鞋試着扮大人，不過我哋都鍾意着西裝，唔抗拒。」
撰文：比華利 攝影：仇志德
Soler髮型：Dannis@Headquarters
Soler化妝：Densis Soler西裝提供：ckCalvinKlein
