【本報訊】二○○五年十二月，當世界大部份人都已經享有民主，當大部份孩子都與生俱來享有普選的權利，香港的下一代卻連一個普選時間表也不曾擁有。為了一個可以在下一代實現的民主普選夢，今天會有一群香港人走上街頭，好讓日後挺起胸膛告訴自己的兒子，我們曾經起來爭取過。為了孩子，為了明天，今日三點鐘，維園見。 記者：蔡元貴
三歲的王靜賢一雙小手執着「普選」貼紙，良久不放。六十歲的外公陳國華昨日牽着外孫女小手，走到皇后碼頭泛民主派花車巡遊起點，聲援爭取普選人士。他今日也準備跟女兒和外孫女一起上街，一家三代參與爭取普選大遊行，「今日唔去，就冇機會爭民主。」他說，除非活到一百二十歲，否則很難看見普選的一天，但是為了孫女，今天必須上街去。
「我哋若果希望我哋嘅下一代喺民主、自由、法治嘅社會生活，就要走出嚟，冇乜嘢要再猶豫，我哋要付出嘅嘢只係好小，對我哋嘅下一代嘅貢獻係好大。」一生從事教育工作、今年已經七十四歲的教協監事會主席司徒華呼籲，為了下一代有更民主、更公平的社會，香港人今日應該站出來爭取民主。
不過陳國華今日參加遊行，不是響應司徒華的號召，而是響應行政長官曾蔭權的「呼籲」。他說：「曾蔭權話香港人喺十字路口，但係《基本法》已經寫得好清楚，香港最終實行雙普選，條路就係向普選嘅直路，何來十字路口？係你（曾蔭權）自己原地踏步。」
年逾七旬的天主教香港教區主教陳日君說：「我都擔心冇機會見到普選喎，冇理由咁樣拖落去㗎嘛，人人都要出嚟咯，後生仔同老人家都要咯。」○三年的7.1，五十萬人頂着烈日大遊行，阻止了政府為《基本法》23條匆匆立法。○四年的7.1，五十萬人再上征途，導致董建華下台。香港人今日再戰街頭，為的是一個卑微的普選夢。
「告訴中央我哋唔接受方案」
陳國華說，市民有責任告訴中央政府及特區政府：「我哋唔接受政改方案。」香港人遵守法律，政府也應該尊重香港人的政治權利，「我個孫女都知咩係好咩係唔好、咩係藥咩係糖，你（政府）明明畀啲山埃我哋食，重話如果𠵱家唔食以後冇得食。我哋知道，𠵱家唔食，至少唔使死。」
教育界樹人為己任，教協會長張文光說，該會已經透過電郵、電話、《教協報》等方式，動員所有現職及退休老師參加遊行，「我希望所有教師，唔理係現職或者係退休，都拖男帶女，一齊上街爭取民主，呢個唔只係為咗我哋，重係為咗我哋下一代。」曾經發起全港中學生加入○三年7.1大遊行的港大學生伍展邦說，年長一輩為下一代爭取普選的決心教他感動，「我好慚愧，佢哋可能等唔到普選嘅一日，但係仍然肯走出來爭取。我𠵱家二十歲，唔想六、七十歲都重要上街爭取，所以一定要爭取一個時間表，一個承諾。」