自言表演慾極強的周麗淇（Niki），由電影大銀幕跳入電視小螢幕，日前更在無綫台慶夜奪得飛躍進步女藝員獎，攀上事業小高峯，但火頭亦隨之而來，搖身一變成為是非精。對於是非，Niki表示多講無謂，因為有人就會有是非，要避亦避不來，只要不妨礙她繼續高飛便行。
周麗淇自言從小受外公和外婆影響，表演慾極度旺盛，童年時曾經學過民族舞和中國舞，她說：「公公婆婆以前喺屋企閒時都鍾意唱吓鄉下歌rap吓跳吓，跟得佢哋多，細細個就鍾意郁手郁腳咁表演。」
奪獎？有咪當bonus囉！
由模特兒圈跳入電影圈遇上第一個伯樂——導演馬偉豪，接拍第一齣電影《百分百感覺2》，之後更成為馬偉豪的御用演員，合作的演員可謂粒粒巨星，包括有梁朝偉、鄭秀文、舒淇和楊千嬅等。其後又殺入樂壇，發揚外公外母傳授的歌唱心得。
之後周麗淇又走入小螢幕，接二連三替無綫拍攝電視劇，今年更憑《秀才遇著兵》中的十二妹一角，在台慶夜擊敗賽前大熱廖碧兒，奪得飛躍進步女藝員獎，是她入行四年來首個獎項。
不過得獎後是非便接踵而來，先傳她拍劇換獎，更甚者是指她上台領獎時假喊，對於種種指控，周麗淇繼續發揮其儍大姐本色說：「我唔算惹是非，因為是非唔係我製造出嚟嘅，話我是非精太抬舉我嘞。可能我出道已經有一定年資，部份人覺得係時候講吓我啩。咁樣都好，可以訓練吓EQ。」
對於廖碧兒賽後聲言自己並沒有落敗，弦外之音似有不服氣之意，Niki說：「人哋嘅意見我唔想講亦唔想估，至於你話係咪實至名歸，咁TVB有機制，係透過觀眾投票選出嚟嘅。獎項其實係一種鼓勵，有咪當bonus囉。」
雖然得獎帶來是非，但Niki仍然渴望再得獎，她說：「獎項對演員係一種鼓勵，有好過冇，有得再攞先配合番飛躍嘅意思，等我可以再飛高嘛。」
降格？有得演出就開心
由電影圈跑入電視圈，對很多電影明星而言是降格，Niki卻不表贊同說：「我表演慾強，有得演出就開心。而且藝人乜嘢都要試吓，既然人哋畀機會你試，即係袋錢落你個袋，賺咗自己終身受用。」
雖然加入電視圈大家庭後，仍未有機會與無綫一眾花旦合作，但Niki對她們的表現卻十分留意，她說：「佢哋每個都係我學習嘅目標，好似郭可盈同黎姿咁，劇接劇除咗體力之外，抽離快可以同時時裝、古裝穿梭，我已經未得。」
撰文：何永寧 攝影：陳偉權
髮型：CorenCheang@Hair
服裝：PinkMartini
場地提供：MindenHotelCourtney'sWineBar
