家輝近年拍過不少杜琪峯的影片，如《大事件》和《黑社會》，當時得令的杜琪峯在拍攝中的新片《放逐》中又安排家輝演出。
情緒起伏大
原本在太太關詠荷懷孕期間，家輝希望盡量減少工作，可以抽出更多時間陪伴太太，但因為杜琪峯的電影，令他不想放過演出機會，還是接了下來，家輝說：「呢部戲主要喺澳門拍攝，𠵱家惟有辛苦啲，盡量兩邊走，如果收得早或第日開下晝，我都會返嚟陪吓老婆，得佢同工人喺屋企，我始終唔係咁放心，大肚婆情緒起伏好大，老公喺身邊，始終會比較好。」
即將為人父母，家輝兩夫妻現時心情都好緊張，關詠荷已開始修讀育嬰課程，每日會播放莫札特交響曲進行胎教，家輝笑說：「有專家話聽莫札特音樂可以啟發小朋友腦部發展，所以老婆咪日日俾肚裏面個囡囡聽囉！呢排我成日挨個頭去聽吓老婆個肚有乜反應，囡囡周不時會用個腳仔踢我，真係好鬼過癮，原來就嚟做老竇嘅心情真係講唔出咁開心，呢刻我真正感受到男人成家立室後嘅快樂心情，我會好珍惜呢個家。」
想再追多個
家輝續說：「十月懷胎唔容易，加上佢都算係高齡產婦，更加需要好好照顧佢情緒，佢本身個人又緊張，𠵱家已經諗定點樣教養個女。早排我撞到李進，佢同我講起兒女經，佢話由個BB出世到養育到佢十八歲成人，如果要俾佢有良好教育，佢計過要使成五百萬，就算普通教養都唔少得過二百萬，所以養一個小朋友，做父母真係唔容易，我同老婆都希望將來可以畀個女有一個良好嘅環境成長，想唔努力搵錢都唔得，生完呢個之後，我希望可以快快趣追多個。」
減少工作量
雖然夫婦二人很重視女兒的成長過程，但兩人對演戲仍然有濃厚興趣，所以家輝從未要求老婆放棄事業，他說：「老婆好鍾意演戲，我相信佢唔會話完全退出，但時間分配方面，可能會減少工作量，呢幾年我同佢經常返內地拍劇，兩公婆見面時間唔多，但將來有咗小朋友後，我諗情況會改善，最少要留番一個喺香港陪個女，唔好畀機會個女亂睇電視，𠵱家好多電視節目都唔啱小朋友睇，我唔想個女冇晒童真。」
事業篇：夫復何求
家輝的星運雖然不及周潤發與劉德華等紅星火紅，但他自問上天對自己不薄，故此亦十分知足。
家輝謂：「做人最緊要知足，正所謂各有前因莫羨人，我自己喺娛樂圈咁耐，收穫都幾豐富，除咗可以娶到關詠荷之外，之前喺電視台同𠵱家喺影壇，總算拍過一啲令自己幾滿意嘅作品，而且就快可以做埋老竇！人生至此，夫復何求！」
進軍飲食業
最近幾個月，經常有朋友想找他合夥做飲食業生意，他蠢蠢欲動說：「我睇過相，相士話我喺內地投資飲食業生意會有可為，我做演員呢一行又未必可以做成世，我真係有諗過搞飲食業，不過有朋友話出年如果爆發大規模禽流感，經濟會好差，勸我唔好搞住，所以我想再畀自己一啲時間諗吓！」
家輝續說：「好多人話藝人做生意一定唔掂，其實我真係唔多信，所以我的確係好想一試自己做生意嘅潛能究竟有幾多？」
撰文：陳月媚
攝影：林德雄