中國無線（2369）上市接近1年，仍然係冷冷地，有靚仔業績同營商優勢，冇乜人知，買嚟等爆。
先講威水史，中國無線係祖國無線方案及設備供應商，呢期主打智能手機，兼且係聯通（762）唯一一家智能手機供應商，亦係全球四家能夠設計及提供GSM/CDMA雙頻模式智能手機企業之一，其餘3家包括LG、Motorola同三星，全部大牌子。
再講，中國無線又同Microsoft、AnyDATA合組策略性夥伴，又係大牌子。講科學技術，講夥伴條件，講客仔背景，全部都好爆炸。又呢期集團智能手機豐收，05年度中期（6月止）純利幾翻一番到3300萬銀，中期去機數目已經等於04年全年，預期05年度業績，繼續爆炸，全年純利上7000萬銀，PE6倍，香港嘅手機或者無線方案商同業，預期PE10倍，中國無線追上同儕，現價（1.13元）要升66%先到價，隻股街貨市值區區兩億銀，等爆。
日東啱快車手
日東科技（365）最近兩個月一路兜底，啱快車手，又講兩點：第一，好多工業股/科技股經過兩年大摧殘，股價低殘，而呢期工業股大反彈，日東現價（0.48元）重貼近兩年低位，或者有換馬炒落後機會。第二，工業股喺上半年原材料重係冇回頭之下，05年度甚至06年度上半年，可能要捱多一陣，講業績買前景，冇乜好講，日東亦唔例外。暫時睇，日東NAV0.83元，現價重有炒折讓條件。日東對上星期，成交唔講得重係多，但開始活躍，博向上衝六七個仙幅度，適合快車手。
錢雋