傳統英雄人物，都唔鍾意招搖過市、暴露身份，一心只默默為正義而戰，視死如歸；不過《神奇4俠》（F4）就話畀你知佢哋冇咁老套！呢齣被譽為美國MarvelComics史上No.1長壽連載漫畫（44年），就可能因叫「英雄」嘅唔似「英雄」，甚至各為私利經常發生鬼打鬼；就係因為佢玩得夠另類，所以大家睇得更真實、更過癮！據講今次已經係第二次被拍成電影，論卡士，特別搵咗《蜘蛛俠》特技班底操刀，動作場面同漫畫感十足，絕對係今個星期必買3區！
記者：陳國輝
故事講述天才科學家烈（艾恩古福特飾）獲得奸商富豪韋特贊助，率領太空人好友賓（米高哲基斯飾）、助手兼前女友蘇珊（謝茜嘉艾芭飾）及其弟弟尊尼（基斯伊雲斯飾），一齊登上太空研究最新DNA。豈料太空船受一股含大量輻射嘅宇宙雲所吞噬，令各人DNA發生劇變，出現異常能力。同時韋特化身邪惡末日博士進行破壞，四人合力與惡勢力對抗，誓要將末日博士鏟除。
笑爆場面多過武鬥
咪以為每一套MarvelComics都一定打餐飽！喺接近兩小時嘅劇情入面，《F4》除咗兩幕較重頭嘅動作戲（一係天橋上，二係對付末日博士嗰陣）之外，整齣電影都係以劇情為骨幹。較少動作戲都唔緊要，最抵死嘅係，當「F4」分別發現自己擁有異常力量之後，生理及心理狀況都出現好大變化，喜、怒、哀、樂統統玩齊，勁搞笑！
隱形忽現身
爆笑度：★★★★★
由謝茜嘉艾芭飾嘅隱形女俠超性感！劇中一幕講佢隱形途中忽然「現身」，不過好在重除剩件內衣頂住，絕對係「超級英雄之噩夢」！
手指點煙仔
爆笑度：★★★★1/2
F4四個人中，尊尼扮演霹靂火角色。佢天生頑皮而且好細路仔性格，當知道咗自己擁有呢種異常能力後，嘗試用手指撻着火扮打火機。
白鴿勁烚石頭人
爆笑度：★★★★1/2
咪睇石頭人外貌肉肉酸酸，查實佢先係F4裏面最心地善良嘅一員。不過，變成石頭之後佢遭遇好慘，唔單止老婆驚到要走佬，想同隻白鴿講心事，亦受到佢大便對待！
橡皮手開門
爆笑度：★★★★
烈嘅DNA變異後，全身都變成橡皮一樣，手腳可隨意伸長縮短。其中一幕，講到因為大門反鎖，當大家冇晒辦法嗰陣，烈突然伸出橡皮手，穿越門縫到另一邊開鎖，夠晒核突！
雙失大奸角
爆笑度：★★★1/2
你估末日博士真係想將自己趕入絕路？查實佢身世都幾可憐，追唔成蘇珊不特止，重要雙手奉獻咗畀烈，更慘嘅係公司正面臨被收購危機，人財兩失，故焗住做奸角！
漫畫實景共冶一爐
講到製作卡士，同Marvel相關嘅動漫改編電影，好似《蜘蛛俠》、《閃電俠》之類，都大玩電腦特技，再加埋前期、後期製作等Makingof片段，真係一張BonusCD亦未必介紹得晒！所以今次，《F4》普通版以及特別版DVD，都分別以兩張DVD嚟區分，其中一張以SpecialFeatures為主嘅DVD，內容超多，例牌者如導演專訪、製作介紹、刪剪片段以及電腦特技等當然唔少得，但最特別嘅係，部份內容介紹會採漫畫與實景兩邊對照方式，感覺好新穎；而且，《F4》嘅MTV亦加入咗好多漫畫元素，讓大家回味漫畫裏面先有嘅感覺，呢張BonusDVD對MarvelFans簡直照顧周到。
Profile
片名：《神奇4俠》
區碼：3區
發行：得利影視
音效：DD5.1/dts5.1
影像：16：9
級別：IIA
