將為人父的張家輝與太太關詠荷由拍拖至結婚，已經歷了十四年的漫長歲月，兩公婆一直以來幾乎從未傳出過任何緋聞，家輝表示兩公婆雖然很恩愛，但同是性格火爆之人，不過自結婚後，彼此思想漸成熟，如有意見分歧，亦會懂得收火，互相忍讓，一段發難反枱的日子已成過去。
家庭篇：有色心冇色膽
張家輝與關詠荷由拍拖到結婚，一共維繫了十四年感情，其間兩人幾乎從未傳出過任何緋聞，家輝日前接受本報專訪時謂：「講真句，我又唔係聖人，外面有咁多引誘，點會話冇歪念，個心係有啲好奇想試吓，但思前想後，唔敢去做，因為代價太大，我擔當唔起，老婆係乜人，我好清楚，以佢嘅火爆性格，如果俾佢知道，肯定會好傷心，呢段婚姻一定玩完，為貪一時之快冒咁大個險，一啲都唔值得，呢個世上，關詠荷喺我生命中嘅位置，係冇其他女人可以取代，我唔想做出一啲傷害佢嘅事。」
視太太為避風港
家輝兩夫妻性格很內向，朋友十隻手指可以數清，平時不用開工，他們喜歡留在家中消磨時間，特別是關詠荷，她比丈夫還要深閨，家輝笑言：「叫佢出街真係幾難，佢好怕人多嘅地方，除咗屋企人之外，佢只會同兩、三個舊同學來往。我哋有乜開心同唔開心嘅事，只會互相分享，佢可以話係我最大嘅避風港，平時有乜牢騷，只會同佢講。所以，無論喺生活上同精神上，佢都係我最大嘅精神支柱。我成日同老婆講，一定要死先過佢，因為冇咗佢喺身邊，我真係唔知啲日子點過，佢重鬧我自私，唔使理吓佢。」
不說不知，原來家輝頗膽小，他從來不敢一個人在家中或酒店房間看鬼片，他不好意思地笑說：「以前細個有過幾恐怖嘅經歷，對靈界啲嘢係幾驚，如果要睇鬼片，除非有老婆陪住睇，一個人就一定唔敢睇。」
婚後思想變成熟
家輝指與關詠荷雖然很恩愛，但兩人性格同樣火爆，在○二年結婚前，兩人經常吵架，而每一次吵架都很激烈，他笑咪咪說：「老婆性格好固執，有啲事我問佢點解唔肯做，問極佢都唔答我，咁我就好容易火起同佢嘈，俾佢頂幾句，我連飯枱都反埋，點知下次又唔知為乜小事同佢嘈起嚟，佢竟然又學埋我反枱！睇唔出佢惡起上嚟會咁鬼大力，我都俾佢嚇窒，之後兩個人喺間屋入面互不瞅睬，真係好辛苦，所以次次嘈完，多數都係我𠱁番佢。結婚之後，彼此思想都成熟咗，已經識得收火，如果意見出現分歧，好多時我會就吓佢，咁樣大家就少咗嘈。」
