孫佳君自從同羅兆輝嘅一段情告終後，今年初自爆同一個新加坡富商劉志坤結婚，連仔都生埋，不過有報道話佢激嬲咗同佢未註冊嘅老公，結果被放逐喺新加坡㖭。不過早排又見孫佳君喺香港出現，佢一時去shopping，一時重同鬼仔夜蒲蘭桂坊，睇個樣似乎一啲都唔寂寞。
頭耷耷急急腳
前晚高音歌王巴伐洛堤喺灣仔會展開告別演唱會，吸引大批高官明星去捧場，記者喺人群中發現孫佳君嘅芳蹤，佢今次就唔係拖鬼仔，而係拖住個大約四、五歲嘅小朋友入場，不過就全程頭耷耷急急腳，當記者叫孫佳君停低影張相時，佢至肯望鏡頭笑一笑，但係再問個小朋友係咪佢個仔嘅時候，佢就拖住個細路一支箭冇回頭咁走咗，反而個小朋友就好好奇，一路上電梯都一路擰轉頭望。
不過馮仁昭都好好奇，個小朋友得嗰四、五歲，識唔識得欣賞巴伐洛堤嘅歌聲？
