【本報訊】爭取民主普選潮流勢不可當！老牌左派愛國人士、一九六七年暴動期間曾被控承印煽動性新聞可能引致公共秩序不安，遭殖民地政府囚禁三年的翟暖暉，雖曾獲委任為兩屆全國政協委員，但對北京拒絕給予港人民主極為不滿，決定不顧頑疾纏身，明日上街以行動表態。翟老說：「政協開咁多會都冇用，我費事再講，用隻腳同佢講。」 記者：羅偉光、莊曉陽
現年八十六歲的翟暖暉，六十年代經營印刷公司承印左派報章，六七暴動時受牽連，遭港府檢控入獄成為政治犯（見表）。由於有此「光榮」歷史，故他在左派陣營地位超然。不過，他對北京阻礙香港民主發展極為不滿。他昨接受本報訪問時表示：「《基本法》寫明○七年就有普選，只係俾北京（釋法）釋咗去，𠵱家連普選時間表都冇，香港人上街好合理。」
六四發電報責屠城
翟暖暉四七年來港，大半生未試過遊行，八九年六四事件後雖沒有參加百萬人遊行，但發了電報到政協秘書處譴責中共屠城，「冇理由無端端開槍射啲細路」，自此他再沒參加政協會議。他說決定明日上街，並非反對特首曾蔭權，只是反對政改方案、反共產黨及反中央，「共產黨成日話搞民主，要多黨合作，其實搵笨，政協開咁多會都冇用，我費事再講，用隻腳同佢講。香港人手無寸鐵，乜都冇，惟有靠對腳（爭民主）。」
奉勸議員不要轉軚
與共產黨交手多年，翟暖暉說要爭取民主，注定香港人要走一條非常崎嶇的民主路。「共產黨咁辛苦打個江山返嚟，點會咁輕易畀民主你？」他鼓勵港人要珍惜遊行示威的自由，明日一定要上街，「唔上街就蠢嘞，民主唔會自己走嚟，一定要不斷爭取。個個人都唔出聲，北京就當你死嘅，普選更加遙遙無期。」他又說普選才是香港落實民主的第一步，必須踏出這一步，香港社會才會穩定，否則只會不斷爭拗，「困住香港民主發展好唔合理。」
作為老牌「愛國愛港」人士為何也要上街？他頗為不以為然地反問：「爭取普選唔係愛香港咩？爭取普選唔係愛國家咩？愛國唔係要愛黨，點解（人大常委）曾憲梓就係愛國，（支聯會主席）司徒華就唔愛國？」部份民主派立法會議員隨時轉軚支持方案，翟暖暉稱，作為政治人物要有操守，否則失信於人便很難得到選民支持。
特首曾蔭權日前上電視硬銷政改方案，翟暖暉大肆批評，認為接受一個不民主的普選方案，寧可政制原地踏步。「曾蔭權話唔支持方案，就要原地踏步，我覺得冇乜所謂，反正𠵱家個方案都唔民主，通過咗同原地踏步都係五十步笑百步。」
人大常委會副秘書長喬曉陽南下與民主派會面，翟指共產黨「咁大陣仗」無非要「𠱁吓人」，喬每次現身不是要釋法就是為民主設限，「總之佢出場就冇好嘢，開座談會即係去聽訓話。」故他對北京容許香港普選不予厚望。
「行得幾耐就幾耐」
年屆八十六，近年身體健康轉差，更曾脊骨受損，翟暖暉坦言渴望見證香港實行普選的一天，若看不到這天來臨，他說難免有點遺憾，更引述魯迅的「絕望之為虛妄，正與希望相同」自況此刻心境，「既不緊張，又不高興，上街唔係要威，亦唔怕俾人鬧，我有糖尿病，行百幾步就要休息，聽日行得幾耐就幾耐。」