湯盈盈飾演的李笑好在《阿旺新傳》結局篇中，雖然不會變成大美人，但打扮和儀容會較當初企理，加上因回復自信心，整個人看來也變得漂亮。至於李家聲在劇中飾演的巴基斯坦人林賓，最終更會與阿好有情人終成眷屬，不過二人的結婚場面只會以對白交代，沒有畫面出現。
問湯盈盈對此結局安排是否滿意時，她昨日說：「滿意，其實初初都有人諗過李笑好到最後好唔好整容變靚，但監製認為整容變靚嘅話，可能會有負面效果，始終我哋想話畀人知，外表唔係咁重要嘅。李笑好由初初冇朋友到結識咗好多朋友，由初初冇自信心，到阿旺令到佢回復自信心，多咗同朋友溝通，一個人回復自信，個人都會靚啲。今次呢部劇畀我好大得着，部劇播完我當然唔捨得，其實當初拍完嗰陣，我已經好唔捨得㗎啦！」
演技受讚賞
至於李家聲亦表示對林賓與李笑好結婚的結局十分滿意，他說：「大團圓結局梗係好啦，呢個世界咁混亂，畀番啲開開心心嘅嘢觀眾睇就最好㗎啦，李笑好同林賓有情人終成眷屬，相信觀眾會鍾意滿意。不過，劇情只會交代話我哋結婚，唔會真係有我哋結婚畫面。」
問到拍攝《阿旺新傳》最大得着是甚麼時，李家聲說：「有人認同自己嘅演出囉，作為一個演員，有人留意總好過冇人留意嘅，其實今次劇中好多演員都做得好出，每個演員都喺佢哋嘅崗位做得好好，好似Benz雄（許紹雄）同盧宛茵咁，佢哋都做得好出。」