蘭西噚日睇中原網頁，見到中記香港住宅部，上個月生意額五千五百幾萬，蝕近三千萬；計埋工商舖部一千二百零萬，都係得六千七百幾萬。睇嚟真係蝕得好金。
但估唔到中國部相當神勇，做到九千四百四十三萬，贏香港部成條街。
中原集團主席施永青話，因為發展商改變賣樓策略，減少開售全新樓盤，搞到中記十一月一手生意大幅減少九成，好彩有二手幫補吓，但中原香港加埋利嘉閣，都係得八千五百二十二萬，重係首次少過中國部。
中原香港最好數嘅，係雪廠街分行，有一百七十八萬，少得可憐，過百萬嘅分行，啱啱一隻手數晒。
睇番中國部，有十個城市過百萬，第一名深圳，近三千七百二十九萬，中央重點打壓嘅上海，就以近二千二萬排第二。
施老闆提點前線員工，話要將注意力放番喺二手，𠵱家市況日漸清晰，累積嘅購買力，好快會釋放，到時佢哋嘅努力就會有回報。
電郵地址：[email protected]