今個聖誕電影檔期，話唔定會出現一股猩猩熱，事關《魔戒三部曲》金像大導演彼德積遜（PeterJackson）執導嘅《KingKong》將會喺12月14日上畫，等唔切重可以早兩日買隻《KingKong》遊戲版《PeterJackson'sKingKong》，率先親身感受電影內驚嚇場面，預早過電影癮！
記者：許福合
今次《KingKong》可以話係最貼近電影嘅遊戲，因為連遊戲開發同電影製作，都係同步進行，以往真係好少見，加上今次電影公司同開發商好合拍，基本上電影情節都可以喺遊戲內重溫，最正係連遊戲內幾位角色配音，都搵番原班演員負責，無論機迷或戲迷，都一樣可以睇得好投入。
聲音提示過關
電影多名角色之中，玩家將會扮演主角之一嘅JackDriscoll，一開始就講到主角們因為要登上一個小島ScrullIsland，由於主要以第一身視點進行遊戲，所以基本上係睇唔到自己，不過記得每當其他角色叫「Jack！」「Jack！」，就係叫緊你，因為遊戲中途，除咗直接操作提示，其他好似點樣通過阻礙物，出口在哪邊等等，屏幕都唔會有字幕提示，所以玩家記得開住聲來玩，咁就可以玩得順利好多，好彩配音係用英文，理解上問題不大。另外，玩家多數時候都會有幾個同伴喺身邊，除咗會講嘢提示之外，同時亦可預告有無怪物會出現，如果前面未清除好，佢哋都會係度等，雖然電腦A.I.似乎幾笨，不過就令玩家走得安全好多。
走入侏羅紀公園
幾位主角原本係想上荒島拍攝電影，同伴之中會有個攝影師，經常左拍右拍，最好笑連女主角，走走吓都會去咗拍嘢，都幾搞笑！勢估唔到，一行人竟然會走入一個侏羅紀世界，起初見到只係稍為大隻嘅蛇蟲鼠蟻，誰知走入去各式恐龍逐一出現，當然唔少得巨無霸暴龍出場，更係非人所能力敵，同時，島上更出現食人族，呢個時候，《KingKong》精髓，有萬獸之王之稱嘅KingKong就會出現！遊戲設定有啲奇怪，玩家竟然可以在Jack同KingKong之間轉換操控，兼任人同獸兩個身份，不過大猩猩破壞力可以大殺四方，又真係殺得好爽快！
揸槍揸矛殺敵
遊戲內由多達38個版圖所組成，只要過關後就可以喺Menu內個別玩番，遊戲玩法重點係如何喺適當時刻，轉換角色，好似部份關卡，例如敵人火力分散，難以通過前路時，最簡單係讓KingKong做牆保護幾名主角，讓人通過。除咗靠KingKong破壞力，操作Jack就更考智慧反應，Jack基本武器係用槍，森林間中都會有小量彈藥供應，不過當用盡時，可以與同伴交換武器，又或者喺地上撿食人族嘅矛同骨頭作武器。另外，亦要多注意地面，好多時過關所需要嘅道具都就咁放喺地，有時就要將矛點燃去放火，火喺遊戲內非常有用。
機迷試玩
遊戲資料
主機：XBOX
遊戲廠商：Ubisoft
類型：動作
遊戲人數：1人
推出日期：12月12日
售價：$299
