曾經自稱「波大冇腦」嘅性感女星李蘢怡（Tiffany），前晚突然被傳涉及一宗高買案件，消息一陣風咁吹嚟，弊就弊在Tiffany咁啱不知所終，冇覆到經理人公司同事電話，令件事一時間變得好迷離。
經理人力撐
噚日朝早十點左右，Tiffany終於喺佢將軍澳新寶城寓所樓下現身，佢着住黑色連身裙、黑靴、黑帽，戴墨鏡，成個女黑俠咁。其實佢都化咗個底妝，但啲粉搽唔勻，搞到塊面啲顏色一撻撻。向Tiffany求證有關涉及高買案一事，佢竟然忍唔住偷笑，重好不屑咁話：「我使唔使高買呀？」講完就上咗保母車，直去中環整頭髮。
去到髮型屋，Tiffany又笑騎騎同記者講，話覺得成件事好搞笑，問佢有冇懷疑俾人整蠱？Tiffany就話：「咁又唔會，不過覺得好笑啫。」噚日Tiffany個經理人簡文狄就話Tiffany前日中午開工，做到夜晚七點左右，之後就去咗錄音室，去完尖沙嘴之後就返屋企，根本冇高買呢回事。至於冇覆電話，只係因為Tiffany瞓咗啫！