唐寧在《阿旺新傳》中一反乖乖女形象，飾演勢利市儈的Angel，為了達成嫁入豪門的目的，想盡辦法接近飾演富家子子聰的黃宗澤，據知在結局中Angel會痛改前非，與被綁架後成功逃脫的子聰結婚。
對於Angel的下場，唐寧前晚在電話中說：「我覺得Angel要變好，佢最後醒覺，明白眼裏唔係只得錢，佢同子聰都應該要結婚嘅。」她笑稱若開第三集，建議Angel要過好日子：「講佢結咗婚、生埋BB，賢妻良母，有個幸福家庭，事業上重好幫到老公，要做個好好嘅人。」
扮奸角心理障礙
唐寧又坦言接演Angel一角初期有心理障礙，她說：「個角色講嘢好勢利，我從來都未試過咁，驚自己做得唔好，好彩監製、宣萱都幫我好多。其實呢排出街時，啲人都會問我點解會做呢個角色，話Angel好衰喎，但唔會鬧，我發現𠵱家嘅觀眾眼光好雪亮，會理解演員做嘅只係角色。」
而黃宗澤昨日則在電話中說：「《阿旺》個結局寫得好唔錯，Angel係奸奸哋，但為子聰付出好多，佢兩個應該結婚。戲入面阿旺好錫我，子聰係一個好幸福嘅角色，個個都錫佢。」他笑稱如開拍第三集，最好安排子聰與阿旺交換靈魂，來個阿旺科幻劇場。