公開發售超購不足1倍，兼以接近下限定價的新股新澤控股（095），噚日竟然一開市已被嘜高至0.90元，較招股價高出55%，其後雖最低急降至0.74元，但仍較招股價高27.6%，全日收報0.77元，較招股價高33%，逾2千萬元成交，表現遠比預期理想。
花旗減持銀建
黑客事前都睇好新澤，主要是因為此股細細粒，公開發售超購唔多，街貨較易消化，收夠貨就會開車。不過，新澤首日就大幅抽高，就出乎佢意料之外，重話追貨要小心，提防接火棒。
銀建（171）上月16日股價一度急挫22%，市傳有大戶被追孖展。結果聯交所資料披露一名投資者林清渠當日沽出1.13億股。但噚日資料再顯示花旗於11月29日沽出2103.6萬股銀建，事件或引起市場再度關注兩者的合作關係是否出問題，但銀建噚日升2.17%，收2.35元。
Cookie話最近要留意國企股，因可能有對沖基金入市炒作。唔通又炒人民幣升值？佢話呢個只係誘因之一，另一個新消息是市傳國企股不但搞A股全流通，亦會搞埋H股全流通，如果國有非流通股股東要向流通A股股東賠償，以換取A股全流通權，則國有非流通股股東若想股份以H股形式全流通，或多或少都要賠償畀現有H股股東，以換取流通權。
兩隻發電設備股發力炒上，哈動（1133）升8.6%至5.35元，上海電氣（2727）升3%至2.525元。全球以核電作為能源料成大趨勢，兩間公司都正在拓展核電設備業務，食正呢條水。
阿虎