天文台話聽日可能會落毛毛雨，天氣轉凍，八方都有啲擔心會影響去遊行嘅人，不過，要民主就唔可以坐喺屋企聽天由命。天氣冷、爭民主之心不冷。
坦白講，若非大家準備上街，好難有機會見到喬曉陽之類京官會咁低聲下氣、煲呔會扮晒可憐，可見港人談判籌碼只得一個，大家唔係想搞亂香港，事實遊行同經濟係兩回事；例如○三年最多遊行，政局夠晒亂，但當年股市吸收外資創新高！
林D9日日求神
講番喬老爺，佢想拆開民主派嘅綑綁要求（既要進步方案又要時間表），至肯南下聽吓意見。試想如果保守派夠四十票，或者個方案唔係《基本法》寫明要經立法會三分之二多數通過，鬼睬你呀，所以唔行出嚟顯示吓實力，人哋就當你冇到。冇五十萬人冇所謂，但係人愈多，將來爭取到嘅亦一定更多。
時至今日，接近特首嘅人都話預咗方案好大機會拉倒，因為中方企硬唔畀時間表，喬曉陽直情話唔合法㖭；除非有奇迹出現，北京實質上同原則上都有讓步，班民主派才會認同。所謂實質就係取消委任議席有投票權；而原則就係真正開始傾路線圖。
咁有冇民主派會倒戈支持方案？新浪網個調查就話阿石最大機會，有成四成七人話佢會轉軚，而向來有「煲呔針」之稱嘅鄭經翰反而排第二，有三成二人估佢，唔知係唔係因為阿石成日返廣州，所以連大班都打低。
大家正忙於搞遊行（或者阻遊行），林D9噚日就去咗個大球場個祈禱會，佢話佢將每一日嘅事務交託畀神，又為世貿同禽流感問題祈禱喎！既然林D9咁虔誠，不如參加埋聽日遊行前嘅祈禱會，為吓香港普選祈禱啦！
爆料熱線：29290000、27860099
報料傳真：26239278
報料電郵：[email protected]