清晨六點，天未光，在火車站的隧道口中，有一隻污糟邋遢，身上布滿牛蜱的狗伏在地上，旁邊則放上一份三文治，像是流浪漢在街上行乞，但經過的人來去匆匆，扮作視而不見，這一刻流浪狗絕望了，面上流露悲傷的神情，但虛弱的身體則無力再支撐，只好繼續等待。這就是Charlie以往的經歷。
記者：曾靜茵
攝影：林栢鈞
鳴謝：ARS（飽暖行動）
Charlie今日不需再流浪，安安定定的在一家三狗的家庭中生活，看見當日禿晒身子的Charlie，你又知唔知三隻中邊一隻係Charlie呢！主人Janice娓娓道來：「其實三隻狗都係領養返嚟，Charlie係第二隻，起初喺ARS見到個領養的呼籲，見佢咁可憐，就立即接佢返屋企養。而第三隻係Dicky起初冇諗過養多隻，不過見佢咁乖，又唔捨得畀第二個。」
全身被牛蜱咬損
「最初帶Charlie去睇醫生的時候，醫生話佢眼同耳都有發炎，個身又被牛蜱咬到損晒，啲牙都爛晒，足足要喺獸醫診所住足一個禮拜，之後返到屋企都係日瞓夜瞓唔多理人，不過一段時間後佢就適應，非常活躍重古靈精怪。」
天氣凍扮咳撒嬌
提起Charlie的趣事，Janice都大讚佢最乖最聰明，「三隻當中佢就最醒，夜晚會識得推張床仔入房同我瞓。當天氣轉涼的時候，佢又識對住我老公咳，好似話佢知：『我冷親呀，快啲帶我睇醫生呀！』」
愛心耐性少不得
看見Janice家中的三隻狗，朋友都以為係寵物店買返嚟，完全都唔似係流浪狗，全因Janice呢幾年來好肯花時間同金錢喺佢哋身上，「其實用幾千蚊去寵物店買隻寵物，不如用呢啲錢去救番其他流浪狗嘅生命，不過錢只可以醫到佢哋身上嘅病，而精神及心靈上，則要用耐性同愛心去對待，佢哋先會開開心心咁繼續成長。」
尋寶過程逐格捉
古靈精怪玩耳仔
日食4餐為食9秒9
