個市繼續去，恒指再漲132點。中移動（941）與滙控（005），夾埋拉高恒指82點，即係其他31隻大藍籌總共令恒指進帳50點。有啲藍籌有超買迹象，先要唞唞氣。
睇吓龍虎榜，覺得有時贏錢，憑運氣。正股喺芬佬或沖佬搞兩嘢之下，相關C輪就變咗火箭，聯想（992）情況就係。
聯想C輪9383：聯想（992）收3.90元，升0.20元。乜消息都出晒，高PE係人都知，但啲錢掟落去，股價就升。
聯想C輪9383收53仙，大升39%。隻輪明年2月尾夠鐘，溢價3.3%，槓桿率7.4倍（有效5.7倍），引伸波幅36.5%，數據正常，爆炸力減弱。高價追貨，要留意風險，風險係正股回吐。
中芯C輪4928：中芯（981）由1.15元上到1.20元，C輪4928由1.2仙飛上2.4仙，升幅100%，做咗阿一，有6球幾成交，有十幾萬銀玩死亡遊戲。
隻輪明年2月尾夠鐘，行使價1.488元，最後埋單冇得剩多過有得剩，不過輸晒只係嗰三兩仙咁話。真係要賭中芯C輪，9677比較實際。
新地P輪3449：新地（016）再升0.35元，P輪冇運行，3449收2.2仙，散39%。隻輪本月13日最後交易，正股跌唔落71.58元（昨日74.85元）以下，隻輪變廢紙，昨日成交嘅87萬真金白銀，等住飲雪水。𠵱家做淡唔着數，如果認為新地會有啲回吐，買P輪，可向9422埋手，不過一動不如一靜。
章盛