唔好以為超女人氣喺大陸下降，原來重有唔少人靠「超女」搵商機。早前武漢有個超女演唱會，好多粉絲都攞住偶像張相要求髮型師依樣畫葫蘆，於是武漢一間髮型屋就為各款超女髮型明碼標價，「玉米（李宇春）髮型一百八十八」，「筆迷（周筆暢）八十八」，雖然演唱會已經結束，但係生意一樣咁掂。據了解，「玉米髮型」貴咁多係因為該髮型要經過燙、染、剪三個工序，工夫多自然貴啲。