呢排好多商場都搞聖誕亮燈儀式，淨係今個禮拜已經有四五單，夠晒熱鬧，禮拜四重有兩個場，撞埋同一晚亮燈。
希慎銅鑼灣希慎道，由希慎董事總經理利子厚主持「愛心聖誕大行動」亮燈，宣揚愛與關懷。至於利舞臺廣場上面，會放置三十呎高、全港最大嘅戶外活動聖誕老人，成為希慎道聖誕老人展覽嘅焦點。
另外，太古地產又一城商場，由太古地產董事總經理高晉年同女星李嘉欣一齊主持亮燈，現場又有聖誕巡遊表演，配合商場鉑金主題，令到成個商場都光燦燦。商場又請嚟默劇演員，以一身鉑金膚色同鉑金打扮，演繹有趣默劇。
又一城放棵掛滿鉑金裝飾嘅聖誕樹喺度，都係想吸引多啲人嚟消費，而喺商場購物消費滿指定金額，可以換取禮物同埋參加抽獎。