當香港觀眾猶豫於選看港產片或美國片之時，不妨考慮於下周二起至本月二十日觀賞第三十四屆法國電影節所精選的新舊電影，今次電影節特別推介一部近作《迷失芳心》，此部戲由艾曼紐琵雅（EmmanuelleBeart）與加士柏于利萊（GaspardlleUlliel）主演，前年在康城國際電影節公映時，反應不俗，故事是改編自前跳傘表演者吉爾．佩浩的法文小說《灰眼睛的男孩》。
推薦睇《過街老鼠》
已成功轉型做導演的馮德倫，相當欣賞法國文化，當然不會錯過今屆的法國電影節。日前他在中環一間法國餐廳，一邊飲紅酒，一邊接受訪問說：「《迷失芳心》呢部戲我未留意到，但我知道電影節有部叫《過街老鼠》嘅舊片，應該幾好睇，觀眾可以去睇吓。法國電影好注重藝術成份，同美國片始終唔同，平時我係會睇美國片多啲，因為美國戲夠商業，進口香港亦比歐洲片多，但歐洲片亦有佢哋本身嘅可觀性，《小企鵝大長征》喺全球咁成功就係一個好例子。」
獨愛《愛美麗》導演
法國導演中，馮德倫最喜歡導演《天使愛美麗》與《美麗緣未了》的尚皮亞桑里（JeanPierreJuenet），他表示：「呢位法國導演所拍嘅戲，不但故事好，畫面亦係好突出，選景又靚，真係好有自己嘅風格，佢處理《天使愛美麗》同《美麗緣未了》兩部戲時，拍得一啲都唔悶，絕對係高手。」
除了法國電影節外，在昨日展開至本月十八日的英國電影新浪潮，共放映十多部舊作，但馮德倫表示平時看英國片的機會不多，如果在電影節舉行期間有空檔的話，也會抽時間去看一、兩部。
採訪：陳月媚
攝影：陳慧安
場地提供：CafedesArtistes（中環蘭桂坊）
逢星期六刊出
