的士石油氣價格原本有兩級，便宜級受政府管制，不依市場規律辦事，唔怪得的士司機入氣要排長龍，葉澍堃與廖秀冬兩位局長可以諗出咁嘅方法，唔到你唔服。如果有價格管制，沙地阿拉伯都會有汽油供應短缺啦。
政府做笨蛋，唔會只有一次。主辦世貿就非常笨蛋嘞，唔計警力成本，貿易署署長楊立門對《經濟日報》（十一月二十九日）透露特區政府辦世貿係為咗盡世界城市責任，真係攞嚟講，特區政府會至少蝕一億五千萬元，如果計埋民間企業為咗準備世貿應變計劃，交通擠塞，學校停課等種種間接成本，香港損失重要多好多。一早張揚嘅旅遊得益呢？突然消失咗，因為好多商務客怕麻煩，取消行程，令高檔酒店失咗預算。
有世貿例子，希望政府可以取消主辦二○○九年東亞運動會，否則蝕本唔止一億五千萬元。東亞運係三流運動會，除咗中國要捧場，派若干好手參加之外，南韓日本都係派新秀參賽，爭取經驗而已。二○○六年有亞運，○八年有北京奧運，前者係奧運預習賽、熱身賽，○八奧運之後，高潮已過，一流選手已經身心疲乏，點會有心機參加東亞運動會吖。其次，香港冇足夠運動場所，未來幾年要興土木，修修補補，投資唔少㗎，到時一流選手冇，觀眾冇，收益冇，搞嚟做乜？
民政事務局局長何志平已露口風話因為籌辦○八年奧運馬術賽，時間唔夠，○九年東亞運動會可能要延期。延乜期吖，拉倒便是。延到二○一○年？係亞運年噃，去到二○一一年？與二○一二年奧運只有一年之隔，好手來港，傷咗點算？何局長不如搵多個藉口，推咗佢算嘞。
辦呢種完全冇賣座力嘅甚麼「盛事」，只係勞民傷財，於香港形象無補，甚或有害，香港都無謂貪慕虛榮咯，爭取多啲大型貨品展覽嚟香港，先至實惠實際。
（按：日前談及駐日內瓦代表TonyMiller苗學禮，竟然一時錯手寫成苗禮善，有讀者投訴，謹此致歉。左丁山與Miller相識十幾年，竟然寫錯佢嘅中文名，實在鎖你。）