大家不要誤會，看到附圖以為連《電腦科技》也要講普選，查實呢張咁有心思嘅普選海報，乃是由高登討論區所發起（http://forum2.hkgolden.com），更成為全港討論區當下熱辣話題，連報紙港聞版都有報道，人氣度絕對直逼78歲普選老人！
文：徐影龍
有乜咁勁？原來當中有位網名「心繫膠國」嘅會員，本着一試無妨心態，發起集資刊登普選廣告Post，一傳十、十傳百，你夾$50我夾$100，五日內居然籌到$15,000廣告費！連廣告設計都有十幾人義務出手，最後決定刊登喺免費報紙am730上。事件經《蘋果日報》港聞版報道後，更火速引起其他討論區注意，相關主題及討論此起彼落，個個都認為繼「告訴我，我還可看到普選嗎？」後，另一感動人心之事件。
愈講愈多人
最令筆者感到興趣的是，高登討論區畀人印象一向係吹水Forum，唔係鬥嘴互踩就係Post人哋嘅網上日誌、私密相簿，鮮有咁「正氣凜然」之舉。其實由此可證，當有人發起某個事件，吸引小部份人討論嘅話，係好容易會陸陸續續引起大眾嘅參與，尤其係年輕人嘅討論區，大多數人本着「你豪我更豪」嘅心態，將話題不斷推上高峯，嗰種瞬間感染力絕對不可小覷！望遠啲，祖國雖然對互聯網諸多箝制，不過喺大陸眾多討論區上，仍不時見到「某某地方官作弊事件」、「某某商店騙人」等話題，而且論點成熟，討論質素頗高。大家唔好以為討論區只係一小撮電腦迷嘅玩意而睇小佢，筆者隱隱然覺得，祖國最有希望正正就係呢種群體討論嘅資訊交流！