又有新股首日掛牌升到收唔到掣，招股時新聞唔算多的敏實集團（425），首日掛牌表現技驚四座，新登場最高升至3.30元，收3.20元，比起招股價2.25元，高出4成多。
經紀黃話，同一保薦人主理的中國龍工（3339），首日掛牌雖然冇敏實咁勁，但上市以來表現亦唔差，睇嚟再有呢間行做保薦人嘅新股招股，實在要望多幾眼。
另外，低迷好耐嘅工業股，陸續見到有轉勢迹象，大隻如ASM太平洋（522）嘅股價，直情創52周新高，昨日又升2.11%，收43.05元，其他如唯冠（334）、毅力（332）等均見有買盤吸納，分別升16%同埋11%。
經紀黃就提到今年曾出現股權變動的精電（710），自從股權變動同埋有些管理層退休後，精電股價一直不振，原因係有芬佬睇唔通，所以密密減持，早排股價一度跌至4.10元。
經紀黃話物極必反，加上工業股氣氛好轉，所以跌到咁上下殘嘅精電，自然有芬佬覺得抵買，現水平可博反彈，短炒一轉。精電昨日升2.86％，收報5.40元，成交金額680萬元。
慕容小初