馬丁噚日喺美國智囊組織NED午餐會上自爆，一直都有唔少中方官員向佢收風，例如問吓佢去美國有乜嘢搞，又或者民主黨某啲問題點投票等。雖然唔知嗰啲人乜嘢來頭，但馬丁好多時都會同佢哋溝通溝通，等佢哋交差。
有人同馬丁收風唔出奇，奇就奇在連佢口中嘅「襟兄弟」，即係太太家姐個老公喎，都成為中方收風對象。
馬丁太太知道咗之後，就教佢姐夫路，叫佢講返馬丁見過報嘅新聞就得，人哋好交差，又冇得失人，真係一舉兩得。呢位中方官員重好識做，問完一大串問題，就送上大閘蟹同荔枝畀太太姐夫當小小心意。無啦啦被帶挈，唔知姐夫先生有冇同馬丁分甘同味呢？
以前馬丁去親外國，啲左仔都鬧到佢飛起，最經典就係話佢賣國，點知今次中方一反常態，一句批鬥都無，馬丁估計係同中央吹和風有關，但亦都笑笑口話，可能煲呔之前都同樣訪問美國，如果佢賣國，煲呔又點？咁睇嚟馬丁都要多謝煲呔，令佢今次可以輕鬆咁出訪。
爆料熱線：29290000、27860099
報料傳真：26239278
報料電郵：[email protected]