我鍾意耕田，或多或少都有啲遺傳，因為阿爸以前都試過做農夫，成日同我講話以前喺李鄭屋邨後面有塊菜田，種菜經驗多過我食菜。「呢啲番薯仔都好好味㗎，點解唔食呀？」阿爸阿媽難得嚟坪洲探我，當然要畀佢試吓我啲寶貝啦！「慌佢唔係怕放屁咩！」阿媽最鍾意整蠱阿爸，連呢樣我都有啲遺傳！「你哋識乜吖，嗱，你將啲番薯仔放喺蔭涼地方四五個月，大約清明節左右，就摘佢啲葉出嚟，埋番喺田度，之後又可以種番成抽番薯出嚟㗎！」「咁啲薯仔我都留番唔食喇！」「但薯仔唔同番薯好似躝藤咁生，所以薯仔發咗芽之後，要切出嚟，將發芽部份向天埋喺泥入面，之後發芽轉化成養料，又可以種出肥嘟嘟薯仔。」「咁紅蘿蔔又得唔得呀！」「雖然大家都係根部植物，但紅蘿蔔就一定要用種子種喇！」「咁……」「你咁多嘢問㗎……（呠……）」唉吔，佢又衰咗㖭！（五十二）
阿花