煲呔前日親自上電視，出盡力希望叫人唔好上街，可惜效果認真麻麻，相信煲呔自己都心知肚明。煲呔噚日喺香港經濟峰會演講，把聲好沙，不過唔係因為病，佢自爆話，前晚八點起就不停咁講嘢講嘢，（梗係上完電視接到好多電話同查詢，搞到把聲沙晒啦！）佢話，如果噚日沙到講唔到嘢，咁就要派稿畀啲人自己睇啦！
煲呔呢個「前推銷員」，今次推銷效果認真差，成個皇帝坐喺龍椅君臨天下咁款，講嘢又冇新意，結果搞到媽聲四起，煲呔今次由「孤獨嘅推銷員」，變咗做「失敗嘅推銷員」，如果因為政改搞到冇得連任，到時就真係上演真人版《推銷員之死》嘞！民主黨張文光話，佢聽到連左派都忍唔住私下孖叉煲呔，講嘢冇料到就唔好出街啦，盞搞到啲市民失望。
唔少人本來估計，煲呔今次講嘢係個炸彈，炸唔散個遊行，至少可以震一震住，但點知原來只係射水槍咁，唔單止殺唔到敵，重搞到火上加油，民主派呢鋪真係多謝佢。
轉sell香港菜館
推銷政改，煲呔就唔多成功，但佢推銷香港嘅表現就好少少。佢噚日喺午餐會話，香港嘅生活多姿多采，英國佬嚟香港唔使擔心冇英超聯睇，香港直播嘅場數唔比英國本土少，美國佬嚟香港又有NBA睇；至於食，煲呔將近數晒全世界所有國家，爭在冇數伊拉克同阿富汗，所以外國人肯定唔會有食唔慣咁話喎。
「除咗傳統嘅中菜西餐外，重有好高質素嘅日本菜、法國菜、意大利菜、富家鄉風味嘅印度菜、俄羅斯菜、地中海菜等。」煲呔數咗咁多菜，唔知會唔會引起外國「色」途老馬誤會，一時心邪聽錯，湧晒嚟香港呢？
煲呔sell完菜，重sell埋超級市場。佢話，除咗各式各樣的餐館外，香港都有不少大型超級市場，售賣來自世界各地的食物材料。意思即係，就算真係唔啱食都可以自己煮，認真搞笑。
煲呔政改推銷失敗，搞到肥龍要出嚟幫佢執手尾。肥龍噚日開完策發會話，都知道班行家一定問政改，所以唔想答都要答啦！佢就大施軟功，多謝某某日報嘅靚女記者，同佢一樣去晒十八區區議會，同佢「風雨同路」，真係令佢非常感動！
爆料熱線：29290000、27860099
報料傳真：26239278
報料電郵：[email protected]