身材豐滿的鄭融出道後不常以性感示人，她覺得性感是內在美，在她眼中，張曼玉與舒淇最為性感。鄭融入行後鮮有緋聞，她表示想結識一位大方、有家教、得體、有風度等具備八項優點的男友，要求甚高。
鄭融最近推出新碟《BeatBeat》，今次她轉型唱hiphop，並以快歌為主，鄭融認為她的歌唱技巧正不斷進步，但需時間磨練，待加強信心及經驗後，更有發揮空間。
父母體諒
鄭融日前接受《HIM》雜誌訪問時說：「我冇諗過音樂上要有乜突破，因為我覺得一個人到咗某一個階段，自然就會做唔同嘅事，自然就會有突破。」
鄭融不算高大，但尚算豐滿，她向來少以性感示人，只偶爾小露以娛觀眾，鄭融說：「性感係內在美，而且要具備智慧、大方同自然，我覺得張曼玉同舒淇呢啲喺人前散發光芒嘅女人最性感。」所以鄭融不會為性感定底線，她之前拍的寫真集也沒刻意表現性感。鄭融自言入行後的生活轉變很大，她說：「我由一個中學生投身社會，要面對時間同工作，壓力好大，好彩父母都係工作忙碌嘅人，所以好體諒我。」談到愛情觀，鄭融認為：「我從來冇改變愛情觀，就係隨緣。我理想中嘅男朋友要大方、有家教、得體、有風度、鍾意搞笑、性格開朗、熱愛運動同識得尊重人，就係咁多。」
大歎甜品
聖誕將近，鄭融卻沒想過有位英俊的男士陪度浪漫佳節，她說：「我理想中嘅聖誕節只要同一大班朋友一齊食大餐，一定要有甜品，然後一齊睇聖誕特備節目、劇集同搞笑卡通片，咁就好滿足同開心。」