林峯年前「邂逅」來自阿拉斯加的雌性雪橇犬MiMi，並火速同居，其後再養雄性雪橇犬Cooper，豈料勁嗲主人的MiMi竟追咬Cooper，令Cooper最終要被迫遷。
林峯原本養了一對雌雄雪橇犬（AlaskaMalamute），雌性的MiMi不足兩歲，來自阿拉斯加，雄性的名為Cooper，兩個名湊起來就像汽車型號MiniCooper，林峯故意促成牠們一對，可是MiMi一見Cooper就打交，又追又咬，令主人頭痛非常，最後林峯無奈地送走Cooper。
必殺技搶波
日前林峯帶MiMi在中環住所附近散步，MiMi一落樓已情緒高漲，在小公園內狂跑十多分鐘，當林峯拋波時，MiMi即以九秒九速度搶波，反應敏捷，主人叫牠「sit」，牠亦合作地乖乖坐下。
提起MiMi與Cooper的同居史，林峯即笑說：「其實MiMi係我同阿Ron（吳卓羲）去買嘅，佢知我一路想買隻雪橇，有次我哋經過寵物店，一齊入去睇啦！見到MiMi覺得佢幾好，合眼緣，即刻扑鎚買。到幾個月前，有個朋友又係養雪橇，不過佢養唔掂，隻狗有八、九個月大，大大隻，公嚟嘅，見過面覺得佢幾靚，就攞咗返嚟養，可能兩隻狗唔係一齊大，成日打交，唔可以同居，跟住我就將Cooper交畀屋企人養。」
貪玩勁黐身
MiMi雖然十分大隻，不過林峯笑牠不是看門口的狗，他說：「佢對個個都好friendly，好貪玩，鍾意周圍舂，又八卦，又嗲，我喺屋企行到邊，佢啲手手腳腳都要揩到你，好黐人。」
採訪：朱倬誼 攝影：林德雄
